Rooigety

  • 4

Foto: melvil [CC BY-SA 4.0], via Wikimedia Commons

Rooigety

Hoogwater 
het die eb gespoel 
tot teen die vasteland. 
Rooi soos gerwe kelpgras. 
Rooi soos die wriemelende krewe wat hyg na asem. 
Jy hoor die weerbarstige wind, die branders 
en krassende tobies, swart geëts in vlug. 
Jy sien hoe die sand die dood vashou 
gapermossels, garnale, perlemoen, 
’n seisoen van verlies. 
Jy wonder oor die rooigety, die plate 
algebloei stuwend soos koors 
al met die oewer langs. 
Hoeveel lewe sal nóg smoor 
as siste bondel? 
Hoeveel droefenis bly?

Toe die vloed terugdeins, 
die donker gekrys wegsterwe, 
waad 
anderkant die laaste boei:

opdrifsels in die water.

  • 4

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top