Foto: Canva
Pretoria
Daar is ’n oomblik tussen lig en donker
Wanneer swael en vlermuis sonsondergang
deel. Wanneer hadeda huiswaarts roep.
Daar is pienk-oranje vasgevang in grys
Vroeg in Maart wanneer die buurtbrakke
Gesels oor die dag se ditjies en datjies.
Daar is ’n gekriek en gekwaak in die voortuin,
iewers ’n toeter wat blaas. Die laaste goue uur
sak oor die stad in gemengde kleure sonder name.
Daar is ’n buurvrou langsaan wat ’n lantern
aansteek, en ’n buurman wat vroeg beginne braai
want load shedding ... En die Spur is weer vol.
Daar is ’n kamer gevul met skemerstiltes
die silhoeët van woorde op papier en
’n vrou in vensterraam afgeëts.
Kommentaar
Loadshedding mooi saam gevat in die gedig. Mens kan maar jou oë sluit en die vol Spur, asook die reuk van braaivleisvure beleef.
Pragtig. Laat 'n ou sommer homesick voel waar ek hier in die verre noorde sit. Dankie.
Dis absoluut pragtig. Ek mis die Hadeda. x
Dis nou oë-toemaak-en-prentjie-sien-MOOI gesê! Carla, jy mag maar jou pen optel!
Ongelooflik, Carla. Ek verlang nou nog meer huistoe.