I Matador
Blinde woesteling! Jy, Dood, komaan!
Storm, deurboor, hier’s my bloed, my bestaan!
My lyf swenk, my slank hand
wuif die doek elegant –
Kyk, onnosel! Die mens! Ek bly staan!
II Selfportret met horings
Verf my naam om my kop in die rondte!
Druk “Picasso” in twintigtal fonte!
Langs my dierkantste buloog
rys die waarheid omhoog:
Minotaur ek, in oog, oor en klonte.
III Minotaur
Watter god het my, bulmens, kolos,
uit my donker gevat, bulkend gelos
in dié eeu, dié doolhof,
blind in lig, lomp, geskof?
Vroue is kos, hulle kan nie verlos.
IV Bul in Guernica
Ek kyk die strydperk met mensoog.
Brandbom blitz daar is geen hemelboog
perd wat gil babas sterwe
stukke mens vlamme skerwe
Ek wag. Dodelik. Stil. Stert omhoog.
Kommentaar
Whew, 'n heel nuwe dimensie van limeriek; ek smaak dit spanne!