Persverklaring: Oproep om gedigvoorleggings vir Merang

  • 0

Naledi is tans een van die voorste uitgewers van Afrikaanse poësie. Onlangse bundels op Naledi se groeiende publikasielys is onder meer Sirkelgang van Johann Lodewyk Marais, Erf en elders van Kleinboer, Laatnageilande van Marlise Joubert en Vyf kleur blou van Hein Viljoen.

Ter viering van Afrikaans se honderdste bestaansjaar as amptelike taal in 2025 nooi Naledi gepubliseerde en ongepubliseerde Afrikaanse digters uit om gedigte voor te lê vir ’n opwindende versamelbundel. Die doel van die bundel is om die Afrikaanse digkuns te vier en ruimte te bied vir die gevarieërde ontginning van Afrikaans as poëtiese taal.

Die bundeltitel, Merang beklemtoon dan ook die idee van feesviering, want “merang” beteken “fees” en word gewoonlik geassosieer met die viering van groot geleenthede in die Kaapse Moslem- omgewing. Die etimologiese oorsprong van die woord is Maleis (“rame’an”) wat “skare” beteken, terwyl die woord “marang” in Javanees “na” beteken, soos in “kom na” (dus ook in die sin van ’n uitnodiging).

Die bundel sal in 2025 verskyn. Die samestellers is Neil Cochrane en Alwyn Roux.

Voorskrifte
  • Maksimum van drie ongepubliseerde gedigte per digter. Geen gedigte wat voorheen in gedrukte of digitale formaat verskyn het, sal oorweeg word nie.
  • Bydraes in enige variëteit van Afrikaans is welkom.
  • Geen beperking in terme van tematiek, lengte, styl, digsoort of versvorm nie.
  • Geen vertalings sal oorweeg word nie.
  • Elke digter wat deelneem, gee toestemming dat hul gedig in die bundel opgeneem mag word.
  • Kopiereg van gedigte word deur digters behou.
  • Geen tantieme sal vir bydraes betaal word nie.
Tegniese vereistes
  • Elke gedig moet in ’n aparte MS Word-dokument voorgelê word.
  • Die lêernaam van die MS Word-dokument moet soos volg aangedui word: Naam en van van digter_gedigtitel.
  • Gebruik 11 punt Arial, 1,5 spasiëring, plaas die gedigtitel in vetdruk.
  • Gedigte moet taalversorg wees.

Stuur jou gedigte (en navrae) per e-pos aan die samestellers: merangverse2025@gmail.com.

Die sperdatum vir voorleggings is 1 Oktober 2024.

Alle gedigte sal aan keuring onderwerp word. Die besluit van die samestellers oor finale opname in die bundel is finaal en geen verdere korrespondensie sal hieroor gevoer word nie.

Neil Cochrane en Alwyn Roux (samestellers)

Oor die samestellers

Neil Cochrane behaal grade in die Uitgewerswese en Afrikaanse letterkunde aan die Universiteit van Pretoria. In 2013 voltooi hy ’n nagraadse diploma in onderrigtegnologie en e-leer aan die University of Maryland University College (UMUC) in die VSA. Hy doseer Afrikaanse letterkunde aan Unisa. Hy was vanaf 2006 tot 2007 as besoekende dosent verbonde aan die Adam Mickiewicz Universiteit in Poznan, Pole. Hy is ’n ervare boekresensent vir verskeie publikasies. Van sy gedigte en kortverhale verskyn onder meer in Nuwe stemme 5 (2013), LitNet, Tydskrif vir Letterkunde en ’n aantal versamelbundels. In 2023 word hy aangewys as die wenner van Versindaba se digkompetisie vir mediese poësie.

Alwyn Roux is ’n medeprofessor in literatuurwetenskap en kreatiewe skryfkuns aan die Departement Afrikaans en Algemene Literatuurwetenskap by Unisa. Gebore en getoë in Benoni, het hy sy akademiese loopbaan aan die Potchefstroomkampus van die Noordwes-Universiteit begin, waar hy sy doktorsgraad in Afrikaans en Nederlands in 2015 verwerf het. Sy navorsing fokus op die verbeelding van Afrika in die poësie en prosa van Breyten Breytenbach. Hy is die stigter van die interuniversitêre aanlyn platform Samespraak. As lid van die Suid-Afrikaanse Akademie vir Wetenskap en Kuns (SAAWK), die Suider-Afrikaanse Vereniging vir Neerlandistiek (SAVN), PEN Afrikaans, en die Letterkundeassosiasie van Suid-Afrika (LASA), speel hy ’n aktiewe rol in die bevordering van Suid- Afrikaanse literatuur. Sy debuutbundel, Weerskyn, is in 2024 by Protea Boekhuis gepubliseer.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top