Persverklaring: Aksie van die burgerlike samelewing – Saam die toekoms in met Afrikaans

  • 0

2020 sal vir altyd onthou word as die jaar van die pandemie en van uiters moeilike ekonomiese uitdagings wêreldwyd! Behalwe die pandemie, was daar ook ander uitdagings vir organisasies en maatskappye. Dit was om aanpassings te maak sodat die werksaamhede op ’n ander manier voortgesit kan word.

Die ATR het vinnig aangepas en sodoende sy werksaamhede uitgebrei. Die Vrouedag-webinaar, wat op Vrydag 7 Augustus plaasgevind het, is ’n sprekende voorbeeld hiervan. Vyf-en-veertig persone van regoor die land het ingeskakel by hierdie aanlyn seminaar met die tema: “Afrikaans as ’n waardevolle hulpbron – selfs al verengels die skole en universiteite”.

Bo, van links: Debra Meyer, Annelise de Vries en Surette van Staden. Onder, van links: Jolyn Phillips, Zahn Hulme, Marlie Coetzee en Merlyn van der Rheede.

Die soektog het geval op die invloed wat die vrou en ma het op die kind. As die ma die regte taalbesluite neem, word die saadjie van meertaligheid ook geplant. Moedertaal en meertaligheid bepaal die toekoms van die kind. 

Die gesprekleier was Debra Meyer, verbonde aan die Universiteit van Johannesburg. Annelise de Vries van Solidariteit het oor “Afrikaans binne die werks- en besigheidsomgewing” gesels. Sy het daarop gewys dat ongebore babas in die laaste tien weke van swangerskap hul moeder hoor en dan ook haar stem na geboorte herken. Ook dat die taal wat kinders by hul moeders hoor, hul emosies, kritiese denke en vaardighede vir meertaligheid vorm. Haar gevolgtrekking is dat Afrikaans wel ’n plek in die besigheidsomgewing het en dat moeders daarom sentraal staan in die debat oor moedertaalonderrig.  

Surette van Staden van die Universiteit van Pretoria se tema was “Afrikaans as leerhulpbron”. Sy het daarop gewys dat toetse getoon het dat moedertaalonderrig wel voordelig is, maar dat daar ’n konteks moet wees wat bevorderlik is vir moedertaalonderrig.

Jolyn Phillips van die Universiteit van Johannesburg se bydrae het gehandel oor “Afrikaans as gedeelde taalerfenis”. Sy het beklemtoon dat ons empatie met mekaar moet hê ten einde te verstaan waarvandaan ons kom en waarheen ons op pad is met Afrikaans.

Zahn Hulme van die Atterbury Trust, se onderwerp was Afrikaans, “’n hupstoot vir ’n beter toekoms”. Volgens Zahn bring ’n taal jou terug na wie jy is. Dis ’n anker en skep ’n band met jou voorgeslagte. Dis deel van ’n mens se identiteit en laat jou behoort.

Marlie Coetzee van VivA Afrikaans – Virtuele Instituut vir Afrikaans, het oor “Afrikaans as familie- en onderrigtaal” gesels. Marlie het gewys op die belang van inisiatiewe wat ons as ’n taalfamilie vir Afrikaans doen. Sy het vertel dat VivA verantwoordelikheid neem vir taalbevordering en moedertaalonderrig deur die daarstelling van innoverende en praktiese projekte. Haar slotsom was dat Afrikaans as familie- en onderrigtaal ’n bate is vir die bevordering van ’n meertalige Suid-Afrika.

Die sprekers het oortuigend aangetoon dat Afrikaans ’n hulpbron van onberekenbare waarde is, al verengels skole en universiteite. Die terugvoer was deurgaans positief. Van die kommentare is: “Fantasties gereël, baie dankie”, “Pragtige, verrykende webinaar. Dankie aan alle betrokkenes vir hul insette” en “Baie dankie aan elke spreker en die ATR vir die inisiatief. Insiggewend en opbouend. Mag die taal van ons hart voortleef en bly ontwikkel.”

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top