O, tere hart
Wat maak jy, o tere hart
hier binnekant in my?
Waarom moet jy my in smart
so ’n diepe leed laat ly?
Reeds dwaal ek elke nag op straat
in my eensaamheid so verlore
Maar ag, wat sal dit my tog baat
om te wens ek was nooit gebore?
Sonder teenstand, sonder stryd
het jy jouself in liefde oorgegee
Nou moet ek my lewe in eensaamheid slyt
want my liggaam sleep jy met jou mee
O hart, jy weet tog goed dis nutteloos
om tot haar hartjie deur te dring
Vir jou is daar enkele troos
jy is net een in haar vriendekring
In stilte sal ek op haar wag
in soete herinnering aan haar dink
Die tyd sal kom waarna my hart so smag
om my lewensbeker vol te skink
Teken in op LitNet se gratis weeklikse nuusbrief. | Sign up for LitNet's free weekly newsletter.