Litnet

Ek lees Gerhard Venter se brief en stem heelhartig met hom saam.

Ons kan in die verlede leef en met wrokke loop maar ongelukkig help dit nie. Ek is net bly ek staan nie in die manne se skoene wat eendag moet gaan verantwoording doen vir hul dade nie.

Ek kan nie veel uitwei oor die oorlog en dade wat gepleeg is nie, ek dra te min kennis daaroor, maar ek is versigtig om te noem dat dit weer gebeur het of aan die gebeur is. Baie mense sal met my verskil, en ek noem dat dit net gevolgtrekkings en aannames is wat ek maak.

As ons kyk in die verlede, hier by die 1960's. Afgesien van die politieke bewind kyk ek na die ekonomiese. Die Rand was een van die sterkste geldeenhede ter wêreld. Die ekonomie het geblom. Daar was politieke onderstrominge en onrus, maar nie op die skaal van die 80's nie. Ons geldeenheid was met goud gerugsteun. Ek is nie 'n ekonoom nie maar ons geld het waarde gehad en was nie net papier nie. Hoekom het dinge agteruit gegaan? Wat het gebeur?

Kom ons kyk na die 90's. Goed, 'n nuwe politieke bestel was onafwendbaar, maar ten koste van wie en tot wie se voordeel? Die huidige regime het nie die politieke wil om die land te bestuur nie. Ons het die sogenaamde beste konstitusie, maar word dit toegepas?

Wat is die staat se verantwoordelikheid teenoor sy burgers? Nou sal daar mense wees wat skree, die staat het 'n verantwoordelikheid teenoor al die burgers. Dit is die probleem. Die staat gaan die gans wat die goue eiers lê, keelaf sny. Ek is nog altyd van mening dat die land weer 'n kolonie is van 'n groot moondheid. Ek kan nie besluit of dit die VSA of Ingeland, Duitsland of Sjina is nie. Wat het geword van die land se bates soos die spoorweg, Yskor, en andere. Ek praat nie nasionalisering voor nie, maar dit was bates van die staat. Die myne praat ek nie eers van nie.

Dit het nog altyd aan "volksvreemdes" behoort.

Finansieel leef ons nie meer in die land nie, ons oorleef.

Ek is bevrees dinge gaan nie makliker word nie.

Reusedwerg