Tien wenke vir nuwe skrywers
- Skryf alleenlik as jy iets het om te vertel; wees gedagtig daaraan dat vir elke boek wat uitgegee word, 'n paar bome afgekap moet word.
- Skryf oor dit waarvan jy kennis dra; as jy nie genoeg oor iets weet nie, gaan vind uit - deur dit self te ervaar, daaroor na te lees, of ander daaroor uit te vra.
- Lees wyd, krities en sonder ophou, verkieslik die werk van skrywers wat algemeen as suksesvol en opwindend beskou word.
- Leef met jou oë en ore (selfs neusgate) oop en 'n aantekeningboekie in jou hand- of broeksak.
- Leer uit goedbedoelde (selfs negatiewe) kritiek; moet jou nie daaroor wip of jou dit persoonlik aantrek nie.
- Oorweeg teenstrydige terugvoer met 'n oop gemoed en besluit self, want geen twee lesers oordeel ooit presies dieselfde nie.
- Moenie jou skryfwerk as heilig beskou nie; wees bereid om jou lieflinge nek om te draai - daardie gunstelingparagraaf, troetelidee, fraai woord, te slim stelwyse.
- Gebruik 'n woordeboek en die Afrikaanse Woordelys en Spelreëls (2002-uitgawe); wees op die hoogte van die grammatika sodat jy reëls met opset en nie uit onkunde nie kan verbreek.
- Moet nie daarop roem hoe vinnig jy skryf en dat jy dit nie nodig ag om 'n manuskrip te hersien nie; dis 'n lui skrywer wat so sê.
- Bied 'n keurig-versorgde manuskrip aan wat mens op die oog af al uitnooi om dit te lees.
