’n Tikkie nostalgie

  • 2

Foto: Canva.com

’n Tikkie nostalgie

Vanaand swerf my gedagtes weer 
na die klik-klak van ’n ou tikmasjien 
’n mixed tape in die agtergrond 
en Tipp-Ex om spelfoute te korrigeer

Sias Reinecke sing van die Suidersee 
en die klanke spoel nostalgies oor my 
soos beelde in vergeelde polaroids 
vasgevangde oomblikke van lank geleë

ons praat annerdag van tannie Esmé 
van die troepie-songs en die oorlog, 
die jonges luister maar net soos ons 
onthou van Carike en Laurika en Gé

ek luister na ’n ou bekende liedjie 
dink aan kruisbeen sit op die mat 
langspeelplate in hopies opgestapel 
en sonder rede verlang ek ’n bietjie

na die grys strate van Johannesburg 
die koue wintersoggende op ’n bus 
op pad skool toe in ougoud en bruin 
herinneringe voer my dekades terug

ons sit weer voor die radio vasgevang 
luister intens na Patrollie 3 3 Charlie
Wolwe dans in die skemer en ander 
wat die aande te vinnig laat omgaan

ek hoor die waterorrel by Wemmerpan 
lag opgewonde in die kar op pad na 
die inry by Top Star; opgeskote kinders 
wat met helder oë die sonstrale vang

  • 2

Kommentaar

  • Avatar
    Esmarie Yssel

    Nostalgie pragtig saamgevat. Afrikaans bly maar die mooiste, gevoelvolste taal. Ek sien uit na al jou ander gedigte.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top