
Foto: Canva
’n Seën vir pars
laat sonstrale
sag en skuins
suiwer oor julle val
groen deur ’n filter
van welige lower
terwyl ou eikebome
hul artritis-arms
hul vereelte hande
omhoog hou
’n onuitgesproke seën
stil oor julle uitspreek –
laat lang jare
gedeelde jare
houtvate word
waarin die struktuur
van gemoedelikheid behoue bly
en verouder
tot toenemende vrede
van water
wat reeds lank gelede
wyn geword het
terwyl die kelder vol is
en oral in die lug
die onmiskenbare reuk
van pars hang


Kommentaar
Fantasties! Baie goeie woordkeuse.
Pragtig uitgebeeld en beskryf.
Pragtige spel met beelde en woorde.
Raak beskryf, Willem de Swyger. Uitstekend uitgebeeld!!