My herfsblaar as troosprys
Ek pluk ’n herfsblaar as troosprys
uit Jou boom van kennis
sit hom saggies langs my gunstelingvers
diep in by Bybel
as herinnering aan ’n gister
wat ek vir altyd sal bewaar
platgedruk tog eensaam gestryk
met die skaal van lewe geyk
terwyl ek afkyk van hierdie hoë rotslys
na die see en al sy lewe
soos hy eb en vloei
homself bemoei met die mens
wat leen uit sy spens vir kos
kinders grootmaak en bestaan
op hierdie aarde diep in die heelal
’n stippeltjie in die skepping
tog vol lewe liefde en leed
terwyl ons nooit vergeet van haat
ons donker maat van Roelandstraat
wat vandag bars uit sy nate
want die mensdom kry swaar
die boosheid vermeerder
sodat mense eerder wil sterf –
sulke dae gaan soek ek my herfsblaar
nou gedroog en broos
om my te troos in my kluisenaarsbestaan
voordat ek hier weggaan
die ewigheid in.
Kommentaar
Baie dankie my gedigte is altyd vir my mooi op LitNet se platform.
Uitstekende vers Johan. Baie geluk!
Hou hiervan, baie geluk met die plasing.
Goed gedoen Johan. Besielende boodskap.
Wow, Johan, dit is 'n treffende diepsprekende gedig hierdie.
Baie dankie.
Sjoe! Dis werklik pragtig! En ons almal loop een of ander tyd hierdie pad.