Litnet

Foto: Canva

MUSE

as ek in my opkyk die suikerbosvoël sien
hang aan ’n telefoondraad
en besef sy gee nie om oor vandag nie

gee ek ook nie om nie

gooi krummels uit op die gras
water in die voëltjiebad
en hou haar dop die skaamtelose flerrie
wat flagrant dartel om ander genote
pierewaaiers wat dink hul is aantreklik
lang manelle op die grond

ek gee nie om vir vandag nie

gaan tee drink en ligsinnige verse skryf
alles ignoreer wat pieng en klop

in my kop in my ore
die oorvloed stemme van karakters
wat aan ’n deur bly skop

kyk! daar dip sy haar snawel
teug nektar uit ʼn blom
en flets weg teen die son

ek? ek gooi my lyf oor ’n stoel
donkerbril op arms in die son

sy weet min wat my makeer
en sy gee ook nie om nie

blerts daagliks op my stoep

sy hou my besig
solank ek net nie hoef te skryf nie