Litnet

Foto: Canva

monsters

die lug verloor sy suiwerheid
saans as hondegeraamtes
in sinkplaatbuurte dwaal
die mens is vasgevang,
toegespin in taai drade
toe in ’n kokon van kuddesonde
in ’n broeiende hophuis,
wat vier gesinne

plus ’n teefhond met 10 puppies
op ketting huisves
huil ’n pasgeborene droewig
in eerstestraat se sloot
in die sjebeen se ally lê ’n dronkie
’n man hang homself
tussen die bookie en die bar

as sondag negeuur se klokke lui
het spinnekoppe klaar gepaar
die wyfie vreet haar maat op
lê eiers in die sponsmatras
nuwe monsters word gebaar