Miljoene reis sonder om ’n voet te beweeg
– vreemdes ontmoet – of om hul lewens
vir gevaar hoef in te boet.
Miljoene reis sonder passasie betaal
– bagasie afhaal, koers kry en self
vlieg, vaar of ry.
Miljoene reis sonder papiere – woorde,
prente reën teen ruite van hul kajuite.
In een en elke druppel huppel kuberfotons
alte goed en lig oop koppe jolig in.
Miljoene reis sonder gewag op intrapslag
tot goësie vol gedoentes geesdriftig:
geskryf, gedig, gefotografeer, geskets,
geskilder, gedans, gesing, gebabbel – geklets.
Miljoene reis sonder gedagtes aan klagtes
en klik kieskeurig vir kunstige klanke
wat klinkklaar aanklank vind.
Miljoene reis sonder vooroordeel teen steel;
goeie goed is lankal gebuit en verby
verveel – veel verder – reeds uitgedeel.
Miljoene reis sonder goor gemoed, sonder
vuil hand na voorland van groot geld gesog
en gemaak deur bedrog.
Miljoene reis sonder kontant; keur en koop
lustig; tik met een hand sleutelsyfers in,
en doen hul sake dadelik gestand.
Miljoene reis sonder bestemmings.
Een of ander kuber-soek-versoek lei
na waar aanlyn en hoek, vars vis hang.
Miljoene reis sonder broek; sonder vrees
vir siekte sonder genees – en verval in
verrot só eie aan versot op beskawing
vol genotverslawing.
Miljoene reis sonder metgesel en bevriend
vreemdes wat hul nooit ooit ontmoet as
teenvoeter vir reis een-een – alleen –
vanaf geboorte tot dood se poorte.
Miljoene reis sonder perk wat werklik
verderf vanweë bederf teenwerk – hul weerstand
sterf op een of ander internetwerf – weerloos.