mens, garneer jou prioriteite: ou skeepvaartgebruik
dié besorgdheid oor die vrag
voor jy van die kaai loskom
kom uit baie eeue se ervaring
hoe wins weg deur vingers glip –
Feniciërs Achajers Aleksandryne Nipponese
Romeine Nore vaarders van die Taag en van Biskaje Britte
Hollanders en dié soort voorvaders het garnering toegepas –
(tot by die wêreld-yk van staal se selbehouering)
hier kom dit egter uit die verlede nou
(aanstons blyk die rede ook):
plaas stukke hout of matte
sakke of ander gepaste materiaal
tussen skeepslading en binnebodem
of hier tussen die sye en die verbanddele
ook tussen die verskillende soorte vrag
daar of daar
op enige ander nodige plekke
(dink binneboudbeskerming dink ’n boot se dye)
ontsien niks wat voor die hand lê en voorkom so
waterskade roesskade
sweetskade vlekskade
skuurskade stofskade
breekskade bytskade
of ’n nare vermenging van ware
tussen daardie hawe en hierdie hawe
behalwe nou: die eintlike eksepsie –
(met eeue se ervaring van geen garnering
dit weet die meeue)
– vir ’n skeepsvrag
bestaande bloot uit ’n klomp slawe
- (met dank aan die WAT, deel 3)