Geagte president Ramaphosa
Ek hoop hierdie brief vind u wel, met ’n goeie koppie tee, die land se sake soort van onder beheer. Maak net seker u kan voor Donderdag ’n masker opsit, en nie soos vorige presidente getalle of woorde verkeerd uitspreek nie.
Meneer die President, Suid-Afrika is nie altyd ’n maklike plek om te lei nie. Ons ekonomie rek soms uit soos ’n ou rekkie. Beurtkrag toets ons geduld, slaggate in die paaie toets ons suspensie. Menings oor u leierskap wissel so wyd soos die provinsies self. Nie almal is u grootste aanhanger nie, maar dit is seker ook deel van die posbeskrywing.
Tog, ten spyte van alles, staan ons steeds op. Ons kla, ons lag, ons maak memes, en ons hou aan. Want as daar een ding is wat Suid-Afrikaners nooit verloor nie, is dit ons sin vir humor – selfs (of dalk veral) wanneer dinge druk raak.
Hierdie brief is dus nie net ’n boodskap van morele ondersteuning nie, maar ook ’n vriendelike herinnering: ons sien die mens agter die titel. Die mens wat soms vergeet hoe om ’n masker aan te sit, soms ’n moeilike besluit moet neem, en soms die las dra van ’n hele land se verwagtinge.
Mag u staatsrede nie net hoop bring nie, maar ook ’n glimlag. Want in Suid-Afrika weet ons: As ons nog kan lag, kan ons nog vorentoe beweeg.
Sterkte, Meneer die President. Die land kyk, luister... en maak soms grappies, but always with heart.
Vriendelike groete
Larissa Lombard, ’n gewone Suid-Afrikaner