Litnet

Ek skryf hierdie na aanleiding van vorige kommentare asook aanmerkings:

Of jy nou gelowige is of ongelowige – almal van ons werk ewe HARD aan ’n huwelik. Daar is geen uitsondering.

Ek het lekker gelag vir Maya se oulike skrywe waarin sy prontuit verklaar sý is die Baas en manlief is die Klaas. As dit vir hulle huwelik werk is dit goed so. Verseker gaan sy nie hel toe nie. Ek glo egter nie dat alle manlike karakters daarvan gaan hou en mag 1 van 2 dinge gebeur: Hy gaan so bly wees dat vroulief alle take en besluite oorneem dat hy homself heerlik gaan neerplak agter die TV en die hele aand ‘channel-hopping’ doen (passief en onttrek vanuit huwelik) OF hy gaan haar blou pot (weer die broek probeer terugkry). Tipiese tendens van ons tyd?

Vrouens kan nie gedwing word om onderdanig te wees nie; net so kan mans nie gedwing word om hul vrouens lief te hê nie. Niks wat op iemand geforseer of afgedwing word, sal enige resultate oplewer. Hetsy Godsdiens, Politiek, Wetenskap, die Bybel of enige huweliksvoorskrifte daar gestel deur enige party.

Daar word verkeerdelik geglo (soos Hans) dat Christenskap die tot slaafmaking en onderdrukking van vroue voorstaan. Inteendeel, die teenoorgestelde is eintlik waar. En om iewers ’n kruisie te trek agter ’n vraag of jy Christen is of nie, dui op geen akkurate weerspieëling of gesonde waardes wel aangehang word in die huwelik of nie.

Die Afrikaner-man is vandag onder geweldige druk om in hierdie land van ons vir hulle gesinne te sorg, te beveilig of ’n toekoms vir hul eie seuns en dogters te bewerkstellig. Verseker het hul nie nodig om deur die samelewing verder geskud te word of om manlikheid-onderdrukking, hetsy in die huwelik of in enige ander opset te ervaar. Dit genereer ’n sissies-mentaliteit asook verkragting van menswaardigheid, terwyl hierdie land van ons kan doen met sterk boereseuns wat weer hul families kan beskerm en beheer.

Ek hang geensins manlike dominansie of chauvinisme aan nie. Ek glo wel dat die Bybelse voorbeeld daar gestel is om ’n huwelik te bevoordeel asook te seën. Watter ander gesonde stem het ons in elk geval wat die orde in die huwelik op kan verbeter? Sielkunde bied nie oplossings, kerke vermag niks asook geen spesiale geloof. (Selfs nie Henn se vele geloofsoortuiginge wat hy omarm, gaan ons help). Inteendeel, dit bring verwarring.

Suiwer Bybelse voorskrifte en riglyne, asook innerlike oortuiging vanaf die Heilige Gees in jou hart saam  gesonde lewenswaardes, sal  bevestiging bring wat vir jou huwelik sal werk! ’n Sondige of verharde hart daarteenoor bewerkstellig altyd dat die ander party seergemaak of verneder word.

Ek bevestig weer: dat vrou of man in waarde voor God gelyk staan, maar dat uniekheid, rolle, talente en gawes verskil. Elkeen op sy aangestelde plek soos deur God daar gestel. Dit is waar die handskoen jou perfek gaan pas, en jou lewe gemaklik uitgeleef sal word hier op aarde.

’n Man wat gegrond is in Christus, sal nie toelaat dat vroue hul onderdruk of oorheers nie. Daarteenoor sal die vrou wat gekoester is in die Here, haar rol met vreugde en vrede uitleef teenoor haar man.

Kan dit so moeilik wees? Eintlik so eenvoudig!

Egskeiding bly ’n ernstige saak. Maak nie saak of jy deur egskeiding gegaan het, sorg net dat jy nie onder ’n donker wolk van skuldgevoelens lewe of die ander party so haat dat dit slaaplose nagte bring nie. Almal van ons is menslik en het eksélf al baie foute gemaak. Die Here veroordeel ons nie daarvoor nie, maar sal jou wel van sonde oortuig. Skei is nie altyd die beste nie. Besluit om eerder deur probleme te werk, jou leeu te ‘face’ (of die buffel soos Chris homself noem), oog-tot-oog kontak met jou lewensmaat te maak, en saam te besin oor Bybelse waarhede soos orde, gesindheid en plek in die huwelik.

Ek is nie ’n Paulus nie, kan ook nie op water loop nie, benodig dieselfde wysheid en krag as enige ander om my huwelik te laat werk of kinders op te voed. Maar weet ek dat Bybelse voorskrifte en riglyne vir die huwelik ons enigste hoop is tot verandering of herstel in ons samelewing.

Hetsy gelowige, ongelowige of agnostikus.

Trienie