Liefde is ... Inskrywings (IX)

  • 0

Hier verskyn nog inskrywings wat vir LitNet se skryfkompetisie "Liefde is ..." ontvang is.

Inhoud:

  • Gwendoline Kordom
  • Mandy van der Merwe
  • Louisa Snyman
  • Jemima Meyer
  • Karlien van Rensburg
  • Zerelda Esterhuizen
  • David Bezuidenhout
  • Leandri Prinsloo
  • Loleta Dalton
  • Annelize Laban
  • Rosalee Meyer
  • Gideon Brückner
  • Carma Shaw
  • Timothy De Vos Botha

 

Gwendoline Kordom

Liefde is ...

Jou stem wat my wek in die donker dieptes van die nag
Die aanraking van jou vel is teer en sag
My binneste ontwaak jy raak aan my siel
Jou glimlag roer my soos ʼn rondomtaliewiel

Ek was soekend in my verlange na jou
My trane drup-drup soos die oggenddou
Jy was eens ver agter skerms versteek
Ek kon jou nooit sien nie jy was verberg

Tot eendag toe ek opkyk en jy voor my verskyn
Presies soos in my drome net mooier en rein
Jou oë weerkaats die liefde wat ek voel
Ek kan nooit glo jy is vir my bedoel

Soos ʼn ridder van ouds staan jy wydsbeen voor my
Diep donker kykers wat my voete laat gly
Jou hande groot en sterk om my te dra
Jou liefde vir ewig dis al wat ek vra

Ek is jou prinses jy is my held
Vir niks verruil ek jou nie eens vir geld
Jou liefde neem my soos ʼn brander in hooggety
Waar ek vir ewig en altyd gelukkig wil bly.


 

Mandy van der Merwe

Liefde is geensins ’n gegewe nie
Soms so onregverdig
Pynigend, seerkry, harde woorde …
Almal smag na ware liefde
Maar nie vir elkeen beskore
Liefde is partykeer blind
Na ’n vlaag van verliefdheid?
Maar DAN ontmoet jy jou sielsgenoot
Die een keer in ’n leeftyd mens …
Sonder dat jy daarvoor vra!
Jou lewe verander handomkeer
Jy sien weer die son skyn
Iemand wat jou verstaan!
Wat net na jou kan kyk en weet hoe jy voel
Iemand met wie jy alles kan deel
En jy WEET net dit is reg, dit is mooi …
Liefde is onvoorwaardelik liefhê, vergewe,
waardeer, vertroue
Liefde vra nie hoe oud jy is nie
Liefde is so mooi!


 

Louisa Snyman

Liefde is die hartklop van alle dinge
die spil waarom als draai
die kernwese van God
Hy wat ons met die liefde toebedeel
sodat ons dit kan beleef en uitleef
en arms vol kan aanhou uitdeel
soos ’n groot gerf kosmos
aan almal langs jou lewenspad
want slégs die taal van die liefde
maak ’n wesentlike verskil


 

Jemima Meyer

broos

as jou water met tyd verdamp

                en sulke bruin ringvlekke
             al om die pot los

sal my vol stingel met pienk en pers vlerke
weer stadigaan ineenkrimp
tot so droog en dors
soos vroeër

nes die blommetjies
vasgebind op my lessenaar
(voorheen vars
uit jou ma se tuin)
wat nou wortelwaarts
staar


 

Karlien van Rensburg

Liefde is gemengde speserye
En om jare saam te staan in rye
Dis om saam te lag
En te leer ’n vrou is sag

Liefde slaap minder as jy
Ook al is die dag verby
Liefde hou jou vas
En slaan soms jou bas

Dit hou aan in jou glo
Dit stel jou altyd bo
Dit droog trane af
Soms is dit saam met jou laf

Liefde vergewe elke keer
Selfs al was dit seer
Liefde kom laaste
Ook al is dit die naaste

Liefde het altyd raad
Dit is ’n goeie maat
Dit laat jou self leer
Dié liefde is teer

Die liefde is onvoorwaardelik
Dit maak tyd dadelik
Die liefde is my ma
Vir wat meer kan ek vra?


 

Zerelda Esterhuizen

Breytenbach sê dit met ’n rooiborsduif
en Boerneef met ’n veer
Maar laat ek gou rymelary en gevleuelde woorde keer,
want as die liefde suburbia, selluliet, snot, koors en skuld oorleef
is dit liefde
Dis daai hand wat donkernag na joune soek
die holte van twee lywe op ’n matras
die takeaway ná die soveelste verbrande kos
die sag praat in die stil ure van die nag
So mits dese wil ek vir jou sê
Liefde is nie net ’n engel nie
Maar dis die liefde
En dis al


 

David Bezuidenhout

Liefde is …

Geloof en hoop teen jou palms gegraveer,
Nog nooit kon ’n woord liefde my gedagtes beheer.
Te onwerklik het my hart se ritme van koers verander,
Ek het jou gekies bo iedere elk, bo al die ander.

Vir jou moes ek teen leë beloftes stoei,
Het baklei teen verskille wat ons liefde wou uitroei.
Daar was ’n rede hoekom God my aan jou toevertrou,
Elke persoon is deel van ’n seisoen, van toe af, tot nou.

Wit-oog-wimpertjie het ek jou genoem,
’n spierwit ooghaartjie het bo die donker ander geloer.
Soos ’n ou horlosie tik-tak teen die muur,
Verloor ek myself in sekondes, elke minuut, elke uur.

Nostalgie heimwee is wat ek wou gil,
Hipnotiese wyse my emosies kon stil.
Goed en sleg is opgeweeg teen mekaar,
En raai-raai die goed weeg gans te swaar.

Liefde is dalk net ’n sesletterwoord,
Maar gee lig deur die donker van nood.
Jy’t my hart in al sy weerstand leer ken,
My nooit laat voel dat ons nie saam sou kon stem.

Liefde is ’n vaste vertrou,
Hoop in dit wat ons glo, maar nooit sal berou.
Jou hart is ’n storie wat ek al lank al ken,
Die seer is weg, ek sien hoe liefde wen.


 

Leandri Prinsloo

Die liefde is ’n sprokie

Soms voel jy verlore
en weet nie wie jy is.
Dan kort jy net iemand
om die eensaamheid te blus.

Die liefde is ’n sprokie
dit kan jy maar glo.
Die liefde is soos ’n trein,
dit laat jou hartklop styg na bo.

As jy in die aand lê
en wens dat iemand daardie woorde kan sê.
Weet net dat jy iemand sal kry,
wat vir altyd by jou wil gaan bly.

Die liefde is die son en die maan,
dit is die middelpunt van ons bestaan.
Jy moet altyd sê hoe jy voel,
anders veroorsaak dit ’n hele warboel.

Die liefde smokkel met jou kop,
maar laat jou hart ook vinniger klop.
So moet nie té gou moed opgee nie,
want om die hoek wag daar dalk ’n sprokie.

Die liefde is eenvoudig gekompliseerd,
maar tog is dit iets waarop ’n mens floreer.
Soms is die liefde iets wat jou bevry,
as jy net bereid sal wees om daarvoor te baklei.

Luister na jou hart en vat ’n kans,
dalk sal jy ook in die maanlig kan dans.


 

Loleta Dalton

Liefde is om ’n leeftyd te deel, elke dag soentjies en drukkies te steel,
Dis ver meer as fênsie klere, soos ’n hoenderhaan wat net wil spog met sy swartbont vere –
Liefde is ’n aksie, dalk net ’n fraksie,
Van wat ’n opregte hart wil hê, om vir altyd in jou maat se arms te kan lê –
Om mekaar styf vas te hou, en ook saam hande in stille gebed te vou –
Liefde is daardie tinteling as ons aan mekaar raak,
Asof jy vir ’n oomblik jou woorde en asemhaling staak –
Dit is om veilig in sy omhelsing te wees,
Een in siel en een in gees –
Maar net ’n bietjie te bederf, biltong in klein stukkies op te kerf –
Om elke oggend koffie te maak, jou maat saggies te soen, ’n mond so volmaak,
Dis dinge wat ware liefde doen –
Liefde is soos ’n vlam in die swart donker nag,
Dit gloei en flikker – ons twee deel in die prag,
Wanneer ons na die sterre kyk, weet ons geen geld maak mens ooit ryk –
Liefde is om saam op die gras te lê, vir jou in ons liefdestaal te sê,
Julle wil niks anders doen, as om mekaar se woorde weg te soen –
Jy het jou maat gekry, verseker vat ek jou vir my –
Liefde is om jou hand te vat, langs my te stap,
Saam op ’n tandemfiets te trap –
Ons herinneringe weg te pak, in ’n klein kassie,
In ons harte, soos onder ons dubbelbedmatrassie –
En as ons oud is, elke oomblik te herleef,
En soos gister, ons drome en liefde na te streef –
Leef liefde vandag, in die oggend en in die nag,
Soos Hy die Drie-eenheid is, mag liefde ook tussen ons met Hom ’n eenheid bly –
Groet mekaar elke dag voor jul ry, sou die dood deur die dag jul van mekaar kom skei,
Weet dan, jul liefde sal vir ewig behoue bly …


 

Annelize Laban

Liefde is net daai gevoel
dat te midde
van al die gewoel
daar iemand is wat verstaan
wie jou so perfek aanvul
drukkies en soentjies
saam op ’n divan opgekrul
standvastig soos ’n rots
gestroop van valse trots
liefde is twee harte saamgebind
wat in die ganse heelal weerklank vind


 

Rosalee Meyer

Liefdesseën

As God's Liefde oor my uitstort
my skadukolle helder word
begin ek jubelend
ligvoets dans
hart en hande
opgehef na Bo
skoongewas met
gul Genadereën
helder strale
van Sy Seën
My hoof druip olie
My beker loop oor
want Ware Liefde
het gekom
ek buig nederig
dankbaar, stil, verstom …


 

Gideon Brückner

Die liefde van het en nie het nie

Is die liefde van nie het nie
’n liefde van nie weet nie
hoe ek dit sê?
hoe ek dit vra
is dit soos bid vir reën?

Is die liefde van het
’n liefde van weet
soos straatligte
wat blink in die eerste reën
en jou oë wat sê
daar is geen ander een?


 

Carma Shaw

Die liefde IS

Hoe die liefde werk –
dit wis ek nie;
ek weet net dat sy IS.

Soos tye en soos ruimte,
soos oseane en soos land;
soos lig en donker wissel,
soos gebergtes, klippe, sand ...
soos kraters wat gekerf is
in die ronding van die maan
en soos die lawa wat smeul
in die hart van ’n vulkaan.

Soos saad
wat op die bar grond lê
en sluimer tot dit reën –
’n anker in die grond instoot,
’n stingel in die lug op loot.

Soos ’n blaar
wat hoop op vog en lig en koolsuurgas,
dié elemente bymekaar inpas
en ’n wonder laat gebeur.

Soos ’n blom
wat met geur en kleur verras –
’n lelie van die vuur
wat kan bloei deur roet en as.

Só IS die liefde net.

Die liefde bind en maak ons vry.

En iewers binne my
meet sy kragte teen die kwade;
vind oorwinning oor die haat
en oor die nyd ... daar's nimmer einde
aan haar stryd.

En sou ek – vir ’n oomblik –
haar wese in my hande vas kon vang
dan sou ek weer die waarheid wis:
Van die liefde weet ek bitter min;
ek weet maar bloot
dat die liefde IS.


 

Timothy De Vos Botha

Droommeisie van my

My fiets het ek gevat
en gery tot hier by die leë dam,
op die dam se val vind ek my nou
in ’n oomblik waar ek jou onthou,
dit is tog hoe jy nog al die tyd in my hart woon
soms kan ek nie glo ek het jou
sommer net so deur my vingers laat glip nie.

Ek is die rede
hoekom jy my gelos het
jy het my verlaat
sonder dat ons net eers daaroor kon praat,
vir maande was my hart dolleeg
en dit het my lank gevat om weer iemand
daarin toe te laat,
ja meisie met die blou oë
jy is dié een
wat weggekom het,
vir altyd,
my droommeisie.

Dit was ’n moeilike besluit
maar net soos jy moes ek
ook een of ander tyd
aanbeweeg,
en nie vir liefde vrees,
ek weet jy sal die seker nooit lees,
maar jou plekkie in my hart
bly altyd leeg,
want daar was net nie weer iemand soos jy,
wat so lekker soen,
met so ’n sprankelende persoonlikheid
soos die droommeisie van my.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top