Litnet

Foto: Canva.com

landuit

landuit koebaai sê vir goeie pêlle 
bly maar ’n diep, rou, hartseer ding 
land in, sou ons julle terug wou bring; 
al die nabye geliefdes voel dieselfde

maar jul paadjie het elders gelei, 
na waarheen Sy liefde julle stuur; 
na jul eie bestemde groot avontuur; 
na waar die mooiste drome soet kan gedy

genoop om ’n klompie kwatryne te skryf 
word net die omarmde rympatroon gebruik: 
vriendskapsimbool wat verryk en ver reik, 
beskermend omhels, arm om die lyf

julle vriendekring is gebou om te hou; 
wanneer julle hunker na geliefdes baie ver 
soek dan die Suiderkruis se helderste ster 
om feestelike vleisbraaikuiers te onthou

mooi loop en woeker met al julle kanse; 
weet vir seker julle dra ons seëngebede 
vir oorlopensvol vreugde en vrede 
onthou net: julle bly ons dam se ganse!