kuur
Foto: Canva
dalk het die aarde minimaal
geswik in sy wenteling
dalk was daar in sy baan
’n bestemde wankeling
en deur die kleinste kier in tyd
deur ’n ruimtelike gleuf
glip ’n verworde virus uit
’n teistering sonder onderskeid
en die hele aarde word siek
diep verkweld en bang
die strate verlate
die bordjies verhang
in ’n kamer vol son
pak sy stillewes uit
vase en blomme en boeke
vrugte in bakke op bont tafeldoeke
met liggetinte water lê sy die gloed
deur die venster neer op papier
laai dan die kwas swaar met pigment
en skilder sorgsaam ’n kuur