Japanse skryfskool

  • 1

vergete vywer
’n padda spring van die wal
geluid van water
(Basho, 1644–1694)

leerder:
daar is ’n padda
wat die heelnag kik en hik
soos ’n kraan wat drup

leermeester:
in egte haikoes
spring die padda in ’n poel
en verdwyn vir goed

in egte haikoes
vermy die digter verge-
lykings soos die pes

in egte haikoes
verwag ’n mens bloukraanvoëls
in plaas van krane

leerder:
daar was ’n padda
in hierdie haikoe, maar hy’t
vir die kraan geskrik

padda:
die haikoedigter
tel heelnag lettergrepe –
padda langs ’n poel

  • 1

Kommentaar

  • johann du plessis

    sjoe! 

     
    daniel hugo se 'japanse skryfskool' - so eenvoudig, dog gelaai met simbolisme; ek's mal daaroor! 
  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top