Die krismisliggies het lankal
hul feestelike vonk verloor,
Van ons kersboom se glorie
is net vuurmaakhout oor
Daar buite val geelperskereën
vir dae al aaneen –
soet druppels genade
oral om ons heen
Golwende groen gebergtes
kontrasteer
met die hemel se stormblou,
wyl ek wonder wat hierdie prille jaar
vir jou en my inhou?
Is daar whisky in die hemel?
Met jou nou ses voet onder
– op die rotse –
V E R D R I N K
sit ek vandag
hier langs jou graf
en wonder
so sommer maar net
of daar ook whisky in die hemel is?
want sou jy tog daar wakker skrik
met ʼn dik babelas,
hoop ek daar wag ʼn kelner
met ʼn knertsie in ʼn glas
Ek hoop dat daar ʼn kroegie is
waar jy ʼn regmaker sal kry –
vóór die hel soos bokhael losbars
as die môredors die oorhand kry
Sonder lokaas na die hemel
sal jy die bus daarheen verpas ...
tensy daar op jou ʼn engel wag
met ʼn dubbel in ʼn glas
Kommentaar
Hierdie digwerk getuig van 'n digter wie se woordewêreld, goed deurleefd is.
Treffend en eerlik geskryf, en het ek na 'n 'whiskey' hartseer wat knop sit in my keel.
Puik
Uitstekend, altwee gedigte laat jou dink ...
Whisky - komies maar sad. Skryfwerk is uitstekend
Krismisliggies - Min woorde wat so BAIE sê.
Goeie gedigte.
Baie dankie vir die saamlees almal, ek waardeer.
Viole, Whisky, Moeder Theresa, krismisliggies en wat nog? Dis lekker om jou werk te lees Loretta
Nog uitstekende werk; beide van hulle.
Baie dankie Ella, ek waardeer die saamlees baie.
Pragtige nuwe leestof Loretta en baie om oor te besin.
Ek stem met Margaret. Jy beskik oor n woordewereld wat nie net goed deurleef is nie maar ook pragtig benut word in jou werk.
Jy het n slag met woorde wat mens verstom.
Uitstekende werk Loretta!
Baie dankie vir die saamlees Wilma, ek waardeer.
2 puik gedigte hier Loreta