Secunda
die lewensaar van kosmosland
pomp ongeduldig vlam en stoom
afgeëts teen hoëveldrand
sluk industrie die eenvoudsdroom
newe grasland, dam en spriet
kristal geraam in winterkou
klop en stu wat geld kan bied
mensebrein die wêreld bou
die maan versink in winkend’ lig
geel en oranje blink die gloed
onophoudelik gretig, polsend, dig ...
nooi elkeen uit kom drink die bloed
en tog … elk’ sel van muur en boom
dring na Sy goedheid en Sy guns
in agterstraat en steeg gesoom
lokshin en bedelaar word kuns
verskiet dendriet van saad en vrug
die mensehart die oord
skoonheid groei, die liefdesbrug
worst’lend soekend in Sy Woord.
Foto: Suzette Botha
Klik hier vir volledige inligting oor die kompetisie.
Klik hier om ander inskrywings te lees.
