Huis, woning, tuiste: Janie Davel se inskrywings

  • 1

Woorde

As dit woorde word uit my rooiwyn mond
en ek soen weer die liefde met afwagting

As die sout van my trane uit my hart se oseaan

keer

op

keer oor my wonde spoel
dan voel ek die lewe asof alles te veel is

Maar dis daar waar my hart klop
En my asem my naam onthou

Maar ek sluk soms my woorde
Ek laat dit bloei op papier
Want my hart se huis is die woorde in sy kluis

Ek skryf met ’n wens om te vergeet en te onthou
My woorde bloei oor diep berou
En ek soen weer die lewe as hy sy arms om my vou

 

Ek wag

Ek wonder of jy my maar net sal liefhê
en ’n plekkie in jou hart sal regmaak vir eendag?

Sal jy jou vingers oor my seer kan trek
en sê dit is verby want jy is by my?

Sal jy ’n huis bou waarin ons liefde kan woon?

Laat my oor jou lippe spoel
Soen my asof jy dit bedoel
Gee my jou trane
Gee my jou seer
Oor elke grens en soveel meer

Want my oë dra die water van wat my lippe nie kan sê
Sal jy my trane jou toevlug maak?
Vir my veg?

Ek breek vir net een woord,
vir een kyk van jou oë

En wag …
vir ’n somersdag

 

Dans in my hartskamers

Blaas jou hooglied oor my lyf
Gee jou asem vir die dans van die liefde
Dans jou passie in die kamers van my hart
Spoel jou woorde oor my

Want jy vloei soos wyn deur my are
Jou asem is my huis
Dit is hier waar ek wil lewe
en ons liefde vir die wêreld wys

As my lippe op joune lê
word die woorde wat ek nog wou sê
skielik niks,
eintlik min, my lief,
as jy my so bemin

 

Belofte in die kaggelvuur

As die lewe my longe vul
verf ek sy skoonheid op my hart se skilderdoek
Afwagting dans in elke kleur
En my sielskleed lewe onder die ligte

As die liefde my versadig met heuning uit haar mond,
skep die kaggelvuur weer vir my ’n tuiste
terwyl elke ster geduldig wag vir sy beurt om met die maan te dans

 

Hartsbundel

Ek wil jou in ’n gedig ombou
Sal jy dans met my diepste vreugde?
Mag ek jou oë deurboor in die middernag se stilte
en jou in my hartsbundel toevou?

Ek wil hê jy moet my ken
waar ek my woorde neerpen
Waar ek skryf oor liefde en leed,
En waar ek loodswaar vlug van dit wat ek wil vergeet

Laat my ’n gedig uit jou asem kerf
terwyl ek jou lewe se kwas in my liefde doop
en vir my en jou die horison verf


 

Klik hier vir volledige inligting oor die kompetisie.
Klik hier om ander inskrywings te lees.

huis1_650

  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top