Huis, woning, tuiste: Hester van der Walt se inskrywings

  • 0

Tuiste

In die hart van my huis is baie wonings:
’n tuiste van boeke met deure van blaaie.
In die huis van my hart is baie wonings −
ek het vir ons ’n skuilplek gaan berei.
Ons hoef nooit weer uit te gaan nie,
die eindes van die aarde kom na ons
deur boeke wat flenters gelees is,
waar riviere van woorde opstoot en oorloop
met watermerke en opdrifsels teen die mure.

My hartkamers het ’n steil trap na die kelder
waar donker woorde soos fok en haat en dood
vretend uitsyfer uit dagboeke met vergete datums.

Daar is ook ’n wenteltrap na die solder
waar herinneringe soos droëperskes
wag vir ons onthou en herkou oor my en jou:
in kartonbokse met albums vol kiekies
en skoenbokse vol Kerskaarte en poskaarte.

Lief, in die boeke van my huis is baie wonings:
ek het vir ons brood en wyn gaan voorberei.
Kom maak jou tuis waar alle woorde soos vlamme brand
en die Suidoos van gister aan die vensters klop.
Kom maak jou tuis in die huis in die hart van my huis,
kom blaai deur my lyf en sit jou boekmerk in
waar jou naam en myne saam geskryf staan,
geboekstaaf in die huis van my hart se baie wonings.

 

Geboorte

In die huis van die haarkapper
hang ’n draadmandjie in die hoek
Onder uit die baarmoeder van klapperhaar
Swel ’n orgidee in volle blom
Die spikkelkelkblare hang in ’n tros
Aan groen naelstringstingels
Liggeel vlinders wat enige oomblik
Kan losvlieg en op jou skouer kom sit
In die huis van die haarkapper

 

Die blou huis

Ma vat altyd ’n bord kos
vir die oom oorkant die straat
hy en die antie het baie op die stoep gesit
toe gaan sy hospietaal toe
en kom nie terug nie
die goeters in die huis is baie blou
want die antie het van blou gehou
nou is die oom se baard so lank
sy snor groei oor sy lippe
en hy is bangmaakmaer
die gang na die kamer waar hy lê
ruik na ou piepie en sweet
en as Ma daar was ruik dit na pine gel
en macaroni cheese en malvapoeding


 

Klik hier vir volledige inligting oor die kompetisie.
Klik hier om ander inskrywings te lees.

huis1_650

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top