My huis
My huis het onvriendelike mure
vol spinnerakke stof en muf.
Geraamtes sit en elke hoek
en hul spoke is
my bure
My huis het tralies voor die ruite
en ’n slot aan elke deur.
Dit hou my lewe veilig binne,
en ander siele
buite
My huis is vol van harde stemme
dit weergalm in elke gang.
Wrede woorde en kritiek
wat stilte sny
soos lemme
My huis hét onvriendelike mure
maar dit is waar ek leef
met harde stemme, slot en grendel
en geraamtespoke
vir bure
Waar my hart is
My huis is nie waar my hart is nie.
My hart is waar dit oop en vry is,
waar denkers dink en kinders bly is.
My hart is waar die arende sweef
en lewendes die lewe leef.
Waar kuns en sang en suiwer klank
die ruimte vul en oral rank,
nie ingeperk deur klip en glas
of mure waar eens vrede was …
My hart is nie waar my huis is nie.
Klik hier vir volledige inligting oor die kompetisie.
Klik hier om ander inskrywings te lees.
