Foto: Canva
Hierdie ding
jy vra hom oor sy lewe
en wil weet van sy bestaan
waarvandaan hy kom
en waarnatoe hy gaan
jy vra hom hoekom kyk hy uit
wat hy deur die ruite vind
daar by die velde en die voëls
en die berge en die wind
hy sê
my mamma loop op seewater
en die branders slaan haar om
en my pappa drink sy vredeswyn
uit bottels van karton
my boetie vlieg sy vlieër
oor sy sneeuwit wentelweg
my sussie dra haar lang kouse
en die bo-dorp sê sy’s sleg
en hier in my denkervlugte
wag daar aasgedroggesigte
al swewend oor my bang
se binnekring
en hierdie skuifel in my weë
in elke tree wat ek gee
lê gegrendel in my omkyk
na die ding
hierdie ding wat wederkeer ...
wat weer en weer bly wederkeer
my uit my skuilings uit gaan haal
en altyd dreigend soos ’n storm
oor my silwerson kom daal