Hen met kuikens
soos ’n hen met kuikens
is jul aan my vasgestring
beskut hier in die skadu
van die ou akkerboom
vanuit my waakkring
en deur my voedingsaar
gedy jul
vanuit my waardestring
met een lewensdoel
om jul fokus
na die regte gang te lei
as moederplant
my opgelegde taak
om jul in voedsame grond
geanker te hou
teen elke stormwind te bewaar
sodat jul vry en vrolik
as jongeling kan baljaar
om eendag groot en sterk te word
self vastrapplek te kry
in eie stukkie waardegrond
jul wortels diep in te stoot
te groei tot eie moederplant
om weer kuikens voort te bring
en so te voltooi
die lewenskring
Kommentaar
Pragtige gedig, Driekie.
Wow, dit is kosbaar.
Mooi gedig met 'n vasvathand geskryf. Veels geluk, Driekie.
Mooi beelde.
Dankie, Anze, Johan en Salvia, waardeer julle lees en kommentaar. Die foto pas nie eintlik by die gedig nie, want die gedig is geskryf met die plant wat ook genoem word hen met kuikens in gedagte 🙂
Welgedaan, Driekie! Weereens 'n meesterstuk uit jou digpen.
Dankie, Theresa en Nico, waardeer opreg julle lees en kommentaar.
Baie mooi, mal daaroor
Dit is so ongewoon pragtig ... die meeste mense weet hoe lyk 'n hen-met-kuikens-plant, maar jy sien hoe jy 'n kind opvoed om eendag selfstandig sy ding doen. Net soos die plant.
Dankie, Magda, jy lees die strekking van my woorde presies soos ek bedoel het.