Foto's: Alfabet van die voëls-bekendstelling

  • 0

SJ Naudé se kortverhaalbundel Alfabet van die voëls is op 15 Februarie 2012 by The Book Lounge in Kaapstad bekendgestel. Trekvoëls, luistervinke, boekwurms en voëlkykers het almal hul opwagting gemaak om te hoor watter eiertjies Louise Viljoen en Naudé self oor die boek te lê het.

Frederik de Jager van Umuzi het Naudé aan die gehoor bekendgestel met ’n staaltjie oor ’n uitgewer wat een aand in die bed geklim het met ’n stapel manuskripte, toe weer uitgeklim het, ’n pak klere aangetrek het, en verder by die tafel gaan lees het aan die manuskrip waarmee hy besig was, omdat dit soveel respek afgedwing het. Volgens De Jager het Naudé se manuskrip dieselfde effek op hom gehad.

Die bundel is tot dusver uit alle oorde oorweldigend positief ontvang, en as mens na die groot opkoms by die geleentheid kyk, lyk dit of lesers en resensente ewe positief oor die boek voel.

Viljoen se gesprek met Naudé was insiggewend en vermaaklik, en Naudé is tot verskeie kostelike aanhaalbare uitlatings gedryf, soos dat sy Afrikaans (wat in die buiteland in onbruik verval het) "soos ’n oermuskiet in die barnsteen" was.

Naudé het die oermuskiet nou, tot ons almal se wins, op die Suid-Afrikaanse literêre landskap losgelaat in ’n bundel wat volgens André P Brink "werklik onmisbaar" is. Twyfel is vir die voëls. Hierdie is ’n bundel wat jy gerus kan aanskaf.

Klik hier om Alfabet van die voëls te koop by Kalahari.com.

 

Vroeë voëltjies: Voor die aanvang van die gesprek tussen SJ Naudé en Louise Viljoen het gaste gekuier en gekwetter met glase (pikke)wyn van Leopard's Leap en versnaperinge.

’n Oomblik van oordenking voor die gesprek. Frederik de Jager van Umuzi, uitgewer van Alfabet van die Voëls, staan diep in gedagte langs SJ Naudé. Hulle gedagtes is onbekend, maar die pikkewyn op die agtergrond dink beslis "P is vir piekniek".

Johan Hugo van The Book Lounge het gaste verwelkom, en laat val dat hy ’n paar voëltjies hoor fluit het dat Alfabet van die voëls ’n goeie kans staan om verskeie literêre pryse te wen.

Louise Viljoen se oorbelvoëltjies het interessante vrae in haar oor gefluister.

Frederik de Jager (in sekere kringe bekend as Jan-Frederik) het onmiddellik besef dat Alfabet van die voëls ’n besonderse manuskrip is. Die krag, skoonheid en onverskrokkenheid van die boek het hom oorrompel.

SJ Naudé het in 2010 saam met die swaeltjies uit Europa teruggekeer om ’n MA in Kreatiewe Skryfkuns aan die Universiteit Stellenbosch te voltooi.

Volgens Naudé was sy eerste indruk van Suid-Afrika by sy terugkeer ’n gevoel van disoriëntasie. Nadat hy die skryfdrang vir baie jare onderdruk het, het die sluise oopgegaan en het hy koorsagtig begin skryf.

Sy eie siening van die kreatiewe proses stem ooreen met dié van JM Coetzee, wat die skryfdaad as ’n soort epileptiese val sien. Dit wil egter voorkom of Naudé ’n lieflike stel vlerke in die val ontdek het.

Viljoen meen dat een van die boeiende dinge in die bundel die wyse is waarop verskillende ruimtes met mekaar in aanraking gebring word. Naudé vermeng ’n verskeidenheid invloede van verskillende tale en kulture om sy unieke skryfstyl en inhoud te verkry.

Die gesprek het ook gedraai by Naudé se "byna klassieke" Afrikaanse taalgebruik. Hierdie verfynde Afrikaans staan volgens Naudé eerder onder die invloed van pretensieuse Britse Engels as wat dit ’n produk is van ’n poging om ’n puristiese Afrikaans te skryf.

Volgens Naudé is sy fantasie-gehoor wanneer hy sy verhale skryf "Die Antwoord se gehoor". Sy gehoor by The Book Lounge het beslis ’n paar aanhangers van Die Antwoord ingesluit, en ’n verskeidenheid voëls van verskillende vere.

André P Brink, Marlene van Niekerk, Alida Potgieter en Michiel Heyns het almal in die gehoor nesgeskrop om na die gesprek te luister. Marlene van Niekerk en Willem Anker was Naudé se studieleiers tydens die skryf van die kortverhale wat in die bundel opgeneem is.

Kirby Gordon van Sanlam luister aandagtig.
Wynand Coetzer, ’n medestudent van Naudé

Fourie Botha van Umuzi

Carla Potgieter van Umuzi

Sonja Loots, skrywer van Sirkusboere, saam met Nèlleke de Jager van NB Uitgewers

SJ Naudé en Pierre Brugman

Frederik de Jager en Henrietta Rose-Innes

Louise Viljoen en Hester Carstens van NB Uitgewers

Nicole Strauss, skrywer van die bekroonde kortverhaalbundel Maal, en Eckhard Cloete


Klik hier om ’n resensie van die bundel op LitNet te lees.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top