Epilepsie
“the moon has lost her memory” – TS Eliot
eklips
sonsverduistering
epilepsie
kortsluiting
epilepsie van die ingewikkelde
sellulietmassa, bepalend van
die lê van die son, die maan, die man en ’n pil:
wat smak-smak
petit mal, die maan laat skadunette
hekel oor ’n son
en kerf aan die kronologiese verloop
van nag en dag en lewe.
en vra oor die waar en wanneer, en wat nou
in oomblikke van duister.
wat met ’n oogrol
grand mal, kop-ruk-rock-en-roll,
seile trek oor die horison,
die son en die maan
en die hede blou maak met die hemel
in ’n oomblik van totale stilte.
en die dood totaal omvou in
die niks.
epiklepsie voor die son
- Uit Die lekkerste perske is ’n vy, 2011, Benedic Boeke.
- Klik hier om die onderhoud met Anne-Ghrett Erasmus te lees.
- Klik hier om Eckhard Cloete se resensie van Die lekkerste perske is ’n vy te lees.