Elders gesien: "Alles begin by menslikheid"

  • 0

Foto: verskaf

Beer Adriaanse skryf op Facebook:

As selfs die afgesonderde Mennoniete dit kan begryp, behoort wit Suid-Afrikaners nie so te sukkel nie. Black Lives Matter gaan oor ’n spesifieke sistemiese ongelykheid waarmee swart mense al vir eeue lank worstel en waarvoor hulle nou ons hulp vra om dit uiteindelik te verander.

Die versoek is duidelik en eenvoudig: "Sien ons as swart mense (en in Suid-Afrika alle voorheen- en tans benadeeldes) bloot ook as mense. Ewe mens as jy."

As ons as samelewing die polisie en weermag kan kry om nie onskuldige mense dood te maak nie, behoort ons uiteindelik ook kriminele te kan keer om nie byvoorbeeld onskuldige boere en werkers in landelike gebiede te vermoor nie. Maar as ons nie eers ons wetstoepassers kan beheer nie, hoe gaan ons ooit opportunistiese kriminele kan keer?

So verskillend soos hierdie uitgangspunte klink, is dit op die ou einde eintlik deel van dieselfde ragfyn geweefde ketting waarmee die mensdom homself deur die modder en ellende vorentoe sleep. Ware voortuigang is ek kyk uit vir jou en jy kyk uit vir my. ’n Samelewing is slegs veilig as almal daarin ewe veilig is. Niemand behoort dit beter te weet as Suid-Afrikaners wat almal basies PTSD het as gevolg van ons hoë vlakke van misdaad nie.

Alles begin by menslikheid. Ag my lewe en ek ag jou lewe. Dis moeiliker as wat dit klink, want ons is vir eeue lank geleer ons is spesiaal en beter as ander mense. Dis nie noodwendig jou persoonlike skuld nie, maar jy alleen is verantwoordelik daarvoor om dit te verander.

Die doel is om by ’n plek te kom waar ons ewe gewalg is ongeag wie se knie op wie se keel is. Maar vir nou is dit duidelik wie se knie en wie se keel dit is en ons moet daarvolgens reageer.

Ek weet my seepkis is vuil en nie baie hoog nie én boonop vereenvoudig ek die kwessie, maar daar word tans wêreldwyd ’n duidelike lyn in die sand getrek en ek dink dis belangrik om te besluit aan watter kant van daai lyn jy is en wil wees. Ek’s saam met die Mennoniete, en hierdie meisie met haar plakkaat ...

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top