Litnet

Foto: Canva.com

Ek wil vir jou nog ’n Kersfees skryf

ek wil vir jou nog ’n Kersfees skryf 
(maar ook vir my) 
met ’n pouveer in my hand 
uit ons twee se geliefde Boesmanland 
waar ’n Desember-somerson  
en ’n plaasoggend op jou gunstelingberg  
nog ’n laaste keer vir jou sal opkom

ek wil weer vir jou my hart toedraai 
met Desember-papier 
vol foto’s en gisters van my en jou 
onder die Kersfeesboom 
gestrik in blou

dan wil ek ’n Oukersaand-wens 
aan die maan ophang 
en met ’n verskietende ster 
my droom oor die hemelruim verf 
dat wanneer ek gaan slaap 
jy saggies aan my wang sal kom raak

ek wil vir ons nog ’n laaste Kersaand skryf 
maar dié keer met ’n sonsondergang 
met jou hartsmense saam op die stoep 
waar ons luister na Kersfees-sang 
en eers as die dag se saamwees groet 
wil ek inpas in die holte van hoe jy vir my lief was 
en ek vir jou

ek wil vir jou nog ’n Kersfees skryf, my lief 
vol van onthou 
my inkspore traan in hemelse blou ...