ek staan op ’n rots tydens my vakansie

  • 0

Foto: Izak de Vries

ek staan op ’n rots tydens my vakansie 
met ’n kopknik aan Antjie

ek staan op ’n rots 
by Mission Rocks 
gebalde vuis in die lug 
onverskrokke (my gebalde vuis is ’n dapper muis 
en daar’s baie wat my bang maak) 
in die stryd teen ... 
onreg? 
(on en reg?)

ek is 
nie gelate en onderdanig nie 
nie regtig ’n vry fokken vrou nie 
(al klink Krog se allitererende klanke so kragtig)

ek is 
ek is vir ’n oomblik ekstaties 
           mens 
in die sproei van ’n moerse golf 
           vry nou 
           kortstondig 
van my stryd teen die kroondraervirus 
van my missie teen gebalde vuiste wat vrou(mens)e moker 
om te pas in ons genderrolle

ek is 
in hierdie oomblik 
is ek 
            sand 
            see 
            klip

ek is 
droef

my vuis sak 
ek skryf Lungile Pepeta1

 
se naam in die sand 
voor die volgende golf breek

ek is 
            (amper weer)
reg

1Lungile Pepeta was die dekaan van die beplande nuwe mediese skool in Port Elizabeth. COVID-19 het hom op 7 Augustus 2020 gesteel.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top