Litnet

Foto: Canva.com

Ek is mal oor jou 
Ek is telkens versot op jou. 
Toe Tafelberg nog kind was, 
was ek reeds mal oor jou. 
Lank voor die branders se stemme wou breek 
of die wind sy eie wil kon ken, 
was ek gaande oor jou. 
Seisoene voor Tulbagh mooi was, 
somers voor Kanonkop kon pinotage maak 
of Blouberg die see kon sien 
was jy reeds in my gedagtes. 
Jare voor die spore op Matjiesfontein se stoep wou stop 
en oom Sias kon sê waar die liefde lê, 
was ek telkens versot op jou.

Toe Engels praat nog ’n sonde was 
so lank is ek al mal oor jou 
dat ek jou nou al lief het in elke taal. 
In ’n tyd waar Laurika wou sing oor Mannetjies, 
het ek gesing oor jou. 
So lank, ja, 
is ek al mal oor jou.