Foto: Canva.com
Dis weer herfs in my tuin
Ek sit op ’n bankie in my herfstuin
verkneukel myself in die roesbruin
en goue blaartapyt argeloos gesaai
deur die wind se wispelturige waai
’n stuitige briesie dans deur die blare
en ’n emmervol verstrengel in my hare
die skaterlag borrelend diep in my
voel ek sorgeloos, gelukkig en vry
die son wat oranje agter die horison sink
laat my aan ’n ou romantiese fliek dink
die een van herfs in ’n groot wêreldstad
wat dan eindig met almal se oë sopnat
die boomtakke vonk in vlammerooi
teen ’n skemerlug ongelooflik mooi
wat is daai liedjie wat Piaf heserig sing
van herfsblare wat herinneringe bring
die reuk van warm appeltert en kaneel
wat tartend met my neusgate speel
bring my aangenaam terug na die nou
van herfskleure wat my wêreld omvou