Litnet

Foto: Canva.com

die oë van ’n boer

vierwiel snorre op ’n tweespoorpad 
kollektief gekamoefleer in wit Toyota-bakkies 
hou rante, hekke en truspieëltjies dop 
in die dorre leuenveld van bemaskering 
waar bekommernis wei 
oë van ’n boer 
wat deur kruishare loer 
want daagliks val die vyfspoedskilde vas 
in ’n ondeurtrekbare moeras 
van plaagadministrasie 
van watter kant sal die jakkals kom 
watter departement se parasiet 
watter aasvoël op parool 
in watter kamp 
by watter deur 
vanaand 
die oë van ’n boer 
in rooi grond gewortel 
in die blou van onse hemel vertak 
is van dor kommermodder deurkraak 
wat wil jy nog van ons vra, Suid-Afrika 
op die lang pad na behoort 
hoeveel gate moet gegrawe word 
hoeveel asemoffers gebring 
voor die spilpunt een kleur water spuit 
hoeveel hektaar met beendere beplant 
voor almal in dieselfde windry staan 
in hierdie haatbesaaide land