Die Nag
Ek drink, nooi die rituele van die nag
Maak die son buig oor die see
terwyl die nagsekel kom
Kerf, kerf, kerf
die bloedige pienk uit haar nek
Laat die son versuip
in Tafelbaai se watergraf
My lykswa kruip langs die agterpaaie
van Langstraat
Waar ek my donker siel sal smeer
teen die vuil mure van my stad
Mense vul die omslag
van die dansvloer
En sy blaai deur my lyf
soos ? vuil tydskrif
My vreemdeling
laat ons sterf met die nag
en rys met die son
uit Tafelbaai se watergraf
Teken in op LitNet se gratis weeklikse nuusbrief. | Sign up for LitNet's free weekly newsletter.