Litnet

Kobus.

Hierdie brief is spesifiek aan jou gerig, en ek hoop jy sal my beantwoord,  maar ander wat lus het, kan ook hulle menings lug.

Die verskeie sendbriewe van die Nuwe Testament  noem ’n anti-Chris, maar dit  is die apokaliptiese boek Openbaring van die Nuwe Testament wat daaraan gestalte gee.  Daarin word beskrywe dat in die eindtyd sal ’n mens of organisasie die gestalte van ’n God wil aanneem en soos God wil praat, en  die sal uitgeken word weens sy nommer 666, die merkteken van die dier van Openbaring. Hierdie dier sal ook in die eindtyd wêreldheerskappy voer en  die Christene onderdruk en vervolg.

Weens die vaagheid van hierdie profesie, bestaan daar verskeie interpretasies. 

Een van die oudste  interpretasie is dat die skrywers van die Nuwe Testament geglo het dat die eindtyd  nog gedurende hulle lewens sou plaasvind, en dat dit Rome gesimboliseer het, beskrywend as die skarlaken hoer wat op sewe heuwels sit waaroor Openbaring van praat.  Op een of ander wyse (kan nie meer onthou hoe nie) het die syfer 666 op keiser Nero uitgewerk. Rome was destyds as die stad van sewe heuwels bekend en ook in die vroulike vorm aangespreek, en skarlaken was die keiserlike kleure. Rome wat destyds ’n wêreld ryk was, was ook die werklike onderdrukkers van die Christene.

’n Ander interpretasie, wat gedurende die hervorming posgevat het was dat die Roomse Pous deur die dier gesimboliseer word.  Skarlaken is die kardinale kleur van die Roomse Kerk.  In verskeie plekke in die Bybel word die rein vrou as God se kerk gesimboliseer, en  die onrein vrou as ’n hoer. Die hervormers wat hierdie interpretasie gehuldig het, het tot die slotsom gekom dat die hoer wat op sewe heuwels sit, die Roomse Kerk met sy afvallige leerstellings simboliseer, en dat die Pous soos God praat en maak of hy God is deur middle van sy titel “Vicarius Fillii Dei” (God se verteenwoordiger op aarde = “Vicar of Christ”), en wanneer hy “Ex Cathedra” uitspreek, hy met God se onfeilbare gesag praat (doctrine of Papal Infallibility).  Die Roomse syfers is in alfabetiese formaat.  Bv. V = 5; X = 10;  C = 100; ens.  Blykbaar wanneer die woorde “Vicarius Filli Dei” se alphabet wat betekenisvolle syfers het en opgetel word, kom daar op 666 uit.  Vandag is daar steeds ’n groot aanhang onder sekere kerklike genootskappe vir hierdie interpretasie.

In die laaste eeu was daar ander vertolkings soos bv. dat die dier  Hitler verteenwoordig het; kommunisme, ens.  Sedert elkeen se ondergaan is hierdie interpretasies gestaak.  Vandag is daar diegene wat Islam as die dier uitbeeld; die New Age Movement; ens. Die hoofstroom Christelike Kerke is geneig om dit “low key” te speel, met amper geen melding daarvan nie, en hulle lidmate word in die duister oor enige interpretasie daaroor gehou.

Kobus.  Daar het jy nou my karige kennis daaromtrent.  Ek gaan nie in enige posisie wees om kommentaar te kan lewer nie, weens my ateïstiese oortuigings, maar ek moet bieg ek is nogal nuuskierig oor jou interpretasie van die merkteken van die dier, en sou graag ’n polemiek van ander Christene ook wil aanhoor.  Ek belowe om nie enigsins negatief op te tree nie.

Jaco Fourie