Litnet

Die manne kan gerus so ’n klein bietjie oor die “This is a man’s world”-ding kom. Dis baie 1960. Goeiemôre, Engel, hier’s jou koffie. Welkom in 2023!

Musiek beïnvloed die tydsgees, en toe hierdie liedjie in 1966 deur James Brown gesing is, was die gier van “baas van die plaas” (of hoofhoender op sy eie mishoop) nog heel gesond. Die lirieke sê darem dat hierdie wêreld wat mans gemaak het niks sonder ’n vrou sal wees nie. Dis vordering, I guess.

Het jy al aandag aan die res van die lirieke van hierdie bekende en geliefde liedjie gegee? Dit impliseer dat hierdie wêreld deur die manne se harde werk en swaarkry gebou is, en dat die vroue net daar is om die lyding beter te maak met hulle mooi tieties (side note: NIKS fout met ’n mooi tietie nie), deur vir kos te sorg en met die kinders te deal. Sommige dink vandag nog so. Wat ’n pot snot!

Die snert moet end kry vir die volgende redes:

1. Die manne het die wêreld toe nie alleen gebou nie.

Die geskiedenis is besaai met tallose vroue wat verstommende dinge doen ten spyte van die glasplafon, vrouehaat, uitdagings wat deel is van vrouwees (soos menstruasie en ma-wees) en vooroordele. Ek noem ’n paar voorbeelde:

• Ruth Bader Ginsburg was op die kruin van die regsprofessie in Amerika en ’n luide kampvegter vir vroue.
• Marie Curie was die enigste persoon ooit wat die Nobelprys in twee verskillende wetenskapsvelde (fisika en chemie) gewen het.
• Oprah Winfrey is ’n mediareus, ’n miljardêr, en ’n filantroop sonder weerga. Een van die min rykgatte wat nie ’n pyn in die gat is nie.
• Frida Kahlo se kuns is aangrypend, onmiskenbaar en eerlik.
• Nadine Gordimer was ’n skrywer, politieke aktivis, en ontvanger van die Nobelprys vir Letterkunde in 1991. Sy het verskeie boeke geskryf wat handel oor die rasse- en morele kwessies in ons land.
• Miriam Makeba, bekend as Mama Afrika, was ’n gevierde sangeres en burgerregte-aktivis. Haar musiek het ons lot onder apartheid en onderdrukking aangespreek. A luta continua.
• Caster Semenya is ons uitmuntende 2016- Olimpiese gouemedaljewenner. Sy is ’n prominente figuur in die bespreking oor geslag in sport en vroueregte in atletiek.
• My vrou is toegewyd aan en lief vir my. Ek is biseksueel (ja, sy weet van die begin af), en ek leef met borderline personality disorder Dit is nie altyd maklik nie, glo my. Ek kan ’n pyn wees. Ons het twee kinders wat ons sáám grootmaak, sy bestuur die bemarkingsafdeling van ’n mediese maatskappy, sy het ons huis saam met ’n span bouers self gebou, en sy het ’n 1970’s camper van eiehandig nuut gemaak. Sy is ook ’n uitstekende kunstenaar. My formidable ride or die. Ek lief jou!

Ek dink ek het my punt bewys.

2. Kosmaak is nie ’n geslagsrol nie. Kosmaak is ’n basic life skill.
3. Vroue is veel meer as tieties en koekies. Verskoon die kru taal, maar hoe vroue in seksobjekte verander word, is walglik, jou dickhead.

Intelligensie is baie moeilik om te meet, en dit sluit verskeie dimensies soos kreatiwiteit, emosionele intelligensie, probleemoplossing en meer in. Dit is nie waar dat die een geslag gemiddeld meer intelligent is as die ander nie. Daar is verskeie studies wat aandui dat daar min tot geen beduidende verskil is tussen die gemiddelde intelligensie van mans en vroue nie. Dit is belangrik om te onthou dat die bekwaamhede en intelligensie van ’n persoon bepaal word deur ’n kombinasie van genetika, opvoeding, opleiding en persoonlike ervarings. Nie geslag nie!

4. Die kinders is jou kinders ook. Jou vrou werk waarskynlik ook.

’n Vrou het haar eie lewe en drome wat sy nie opsy hoef te skuif vir dié van haar man en kinders nie.

Wat kan jy, as ’n man wat die onsmaaklikheid hierin raaksien, doen?

• Hou op om jou blind te staar aan tradisionele geslagsrolle. As jou vrou ’n beter handyman (sien wat ek bedoel) as jy is, of meer geld verdien, waardeer haar daarvoor en gee haar die ruimte om haar ding te doen terwyl jy gaan kosmaak.
• Hou op om neerhalende opmerkings oor vroue te maak. Hulle is nie neulkouse of kekkelbekke of watter belaglike woorde ook al gebruik word nie. Leer jou kinders reg. Praat van jou dogter as sterk en jou seun as die een met die sagte hart. Mens kry sterk vroue en sagte mans.
• As jy nie weet hoe nie, of jy is te lui, begin kosmaak. Dit is nié ’n vrou se werk nie. Almal moet eet. Gaan doen sommer die inkopies ook. Leer jou seun kook.
• As jy die superheld en die rolmodel vir jou kinders wil wees, wees daar. Wees teenwoordig en laat hulle toe om te wees wie hulle is. As jy te min tyd hiervoor het, is dit dalk tyd om jou prioriteite in heroorweging te neem.
• Suid-Afrika is die hoofstad van geslagsgebaseerde geweld. Beveg dit. Praat met jou brasse!

Mans het selfs vir God geclaim! Wie het besluit God is ’n man?

Ek sluit af met die woorde van die meesleurende Amanda Strydom. Ek lief jou, Miss Mandy, al ken ek jou nie:

Moeder God U ken my waan
My ego en my regopstaan
Die drake waarteen ek bly veg
U wys my altyd weer die weg

U het my met U lig geseën
Die lig strooi ek op iedereen
Net U weet hoe my toekoms lyk
Ek het niks, U maak my ryk