Litnet

Die koue binne my

Foto: Canva

diep binne
brand ’n honger
wat ek nie kan stil nie
iewers warrel ’n miswasem
van pyn wat nooit bedaar nie

kyk dan mooi – neem waar;
op die ritme van my hartgrafiek
sal jy my psige sien
in die skadu van my oogknip
’n duisend ongestorte trane
(en om my mond die glimlag
wat gesterf het soos ’n droë rivier-
loop) terwyl my arms leeg
aan my sye geanker hang
dit was toe my stem gevlug het
vir die eensame eggo’s
vanuit ’n koue woning
        wat skuiling moes bied
aan die ysigheid binne my