Litnet

Laat ek vandag maar bieg
sonder ylpraatjies of om te lieg
oor hoe jakkals ’n honger hart
met mooi broodjies kan bedrieg;
soos daai aap op die rug
wat jou hinkepink laat swig
jou kognisie katswink laat
met vier stewels in die lug

– té laat vir jou –
om ’n vurk in die hef te steek
glip hy sy aap uit die mou
– te gou –
het liefde deur die mure
van Jerigo gebreek
met jakkalsdraai beloftes
wat met leuens vetgestop is
en ’n slapriem
wat die hart op horings neem –
wyl jy jouself horende doof
oor ’n dooie rot verheug
skop hy nes agter die kraalmuur
waar hy owerspel kan pleeg

en – as spyt jou ooit ’n snotklap
met die stiegriem toedien
onthou hoe jy die mistrap
deur die vingers kon sien …

***

Nota van die digter: ’n Idioomboeket is ’n digvorm wat hoofsaaklik, soos die naam aandui, uit ’n versameling of rangskikking van idiome en slagspreuke bestaan. Dié digvorm word gebruik om ’n probleem indirek aan te spreek en sodoende ook ’n lewensles te openbaar. ’n Feit, hartsaak of ware gebeurtenis kom deur middel van ’n mengelmoes van slagspreuke (wat saam sin maak) op ’n komiese wyse op die lappe.

Ook deur Loretta Szikra:

Le quattro stagioni