Litnet

Foto: Canva.com

Dapper vrou   

Skerp en warm en jakkalsslu 
sluip jy weer vandag deur my eens parate lyf 
jou ruiltransaksie eis my lyf se pond vleis – drupsgewys 
lam en gelate aanvaar ek die vasgestelde prys

Jy is my onwelkome vertroueling – 
jy ken my stil-skree as ek verlam 
maar dapper, my broodnodige deel ontvang.

Tog, deur alles onthou ek die Lam en die Brood …

Steeds fluister Sy stem in my brose oor 
koester die Lam my vodde vlees 
omarm my Vader my honger, hunkerende hart

Tot ek weereens vreugdevol 
my hart ooprol 
voor Sy deurspykerde voete.