Covid

  • 0

Foto: Canva.com

Covid 
jou stilte raak al meer tasbaar 
vandag is dit vier weke 
jou hemp lê nog onder die kussing 
jou hond langs die bed 
jou horlosie langs die wasbak 
maar wáár is jy 
wat my oggendmens was 
gedigte in my ore gefluister het 
my lyf laat sing het van begeerte 
waar is jy waar is jy 
wat saam met my series kon kyk 
tot na middernag en dan 
sushi by die Griek gaan eet 
waar is jy waar is jy 
as ek snags omdraai en soek 
na jou asem jou lyf 
met arms wat vra 
waar is jy 
as die voordeur nie meer toeklap 
jou sleutels nie meer op die kassie kletter 
en jy nie meer roep na my nie 
waar is jy 
as jou selfoon lui 
die tandarts bel oor jou afspraak 
en ek nie asem het vir antwoord 
waar 
in hierdie verskriklike braakland van stilte 
gaan ek jou lank genoeg kan onthou?

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top