Litnet

Na aanleiding van Jaco Fourie se brief van 28 Januarie  (Dan Roodt se verwarring mbt onnoselheid en Johannes Comestor se opvolgende kommentaar, het ek Roodt se twee rubrieke van 19 Jan en 26 Jan op Praag se webwerf gaan lees.

Volgens Comestor is …”Roodt wyd belese en toon hy dikwels goeie insig. Deur 'n ander standpunt as die geykte polities korrekte te stel, vervul Roodt myns insiens 'n baie belangrike, eintlik onontbeerlike, funksie. Ek (Comestor) lees gedrukte koerante en ook Praag sodat ek tot 'n eie en hopelik ewewigtige standpunt kan kom.”

In sy twee rubrieke trek Roodt los teen onder andere wyle Dr Van Zyl Slabbert, Adriaan Basson van Beeld, Helen Zille, Naspers, Koos Bekker, en Proff Jonathan Jansen en Russel Botman. Paragraaf op paragraaf fulmineer, vervloek en verwens Roodt hierdie mense en sommer alles wat nie “Praag” is nie. Om die volle omvang van sy vloek- en skelredes te begryp, gaan gerus na praag.org/rubrieke en gaan lees self die gevloek en geskel. Dis só erg dat ‘n mens nie die goed hier direk kan aanhaal nie, want dit kan hierdie forum onnodig blootstel.

Soos Johannes Comestor glo ek ook dat ‘n mens aan uiteenlopende standpunte en opinies blootstelling moet kry, om daarna tot ‘n “eie ewewigtige standpunt te kan kom” Wel, ek het voorheen besluit dat Praag se webwerf nie vir my is nie, want opinies wat só haatdraend en onbeskaaf is, lewer géén bydrae tot ewewigtige meningsvorming nie. Dis net ‘n gevloek en geskel. Wéér het ek tot die besef gekom: Dankie, maar nee dankie, ek sal my mening laat slyp op baie ander (ook konserwatiewe en behoudende) forums, maar definitief nie hiér nie. Roodt se opinies is nie meningsvormend nie, dit besoedel net.

Die toppunt egter is om te sien hoe hierdie “eendersdenkende” volgelinge van Roodt onder mekaar invlieg onderaan sy rubrieke by die kommentaar-seksie. Dis die een belediging na die ander, dreigemente van laster teenoor mekaar en dreigemente van fisiese geweld. “...As ek net weet waar jy bly!!”... daai tipe ding. Wat sê dit vir ons? Roodt / Praag aanhangers duld  nie eers debat of verskille in eie geledere nie, wat nog te sê met opponente en mense van ander oortuiging. Die gedagte om saam met die lot in ‘n tuisland te bly, gee my koue rillings.   Om af te sluit: My siening van Praag en Dan Roodt bly onveranderd. Soos een van Roodt se volgelinge, Arnieann vir ‘n ander een sê: “En verder is ek met jou klaar, I do not suffer fools gladly”  Dit staan net so daar!

So vir ‘n nagedagte: Koos Bekker en Naspers word só deur Roodt en kie uitgeskel dat geen spreekwoordelike see hul ooit in Praagland sal kan reinig nie. Nou wonder ek, hoeveel van dié mense het al hul DStv en MNet subskripsies gekanselleer? Want as dit nie vir Koos Bekker was nie ...

Dirk Rigter