Litnet

In die laaste verkiesing het ek saam met die meerderheid Afrikaners, DA gestem.  Nie omdat ek enigsins met die DA beleid te vinde was nie, maar suiwer in ‘n poging om die ANC meerderheid onder 66% te behou sodat hulle nie aan die konstitusie na willekeur kon torring nie.  Boonop hou ek van Helen.  Op daardie stadium het die DA nie BEE asook die verlenging van die grondeis kwessie ondersteun nie.  Sedertdien word beide sake  nou  deur die DA ondersteun, wat vir my onuithoubaar is.  Mazibuko het ook vir Afrikaners laat weet, julle was op ‘n stadium vir die DA nuttig, maar nou  is julle vir die party uitgedien.  Julle kan maar loop.  En dit is presies wat ek gedoen het.

Maar dit skep toe vir my ‘n dilemma.  Vir wie gaan ek nou moet stem?  Die druk op my as Afrikaner om tog, nieteenstaande wat hierbo gesê is,  vir die DA te stem suiwer  om die ANC ‘n 66% meerderheid te ontsê, is nie meer van toepassing nie, want alle aanduidinge is daar dat hulle wins in elk geval onder 60%, en in sommige gevalle selfs onder 50% gaan wees.  Dus bly die  konstitusie veilig.

Die enigste party in die parlement wat BEE en die verlenging van die spertyd vir grondeise teenstaan, is toe die VF+  ‘n party wat ek die afgelope 5 jaar verfoei het. Die VF+ het ‘n swak leierskap.  ‘n Outokratiese Mulder familiesaak  wat  knap manne (oa Willie Spies)  vir AfriForum verloor het.  Ek hou steeds nie van die Mulders nie.  Ek hou steeds van Helen.

My keuses?  Glad nie stem nie, of vir die VF+ te stem!

Dit gaan teen my grein om glad nie te stem nie, dus sal  ek maar vir die VF+ stem.  Hopelik dink genoegsame vorige Afrikaner DA-ondersteuners soos ek en ondersteun  maar die VF+.   Ek hoop ook dat die DA die verlies aan Afrikaner ondersteuning daadwerklik,  met ‘n verminderde stem,  sal aanvoel.  Hopelike met meer setels in die parlement, sal die Mulderfamilie uit die kussings gelig kan word om sodoende ‘n dinamiese party tot stand te bring wat vir alle minderhede in die land standpunt sal inneem.

Jaco Fourie