Litnet

Op die meegaande foto kan gesien word daar hang 'n slang - 'n kleinerige een - in die boom. 'n Laksman-voëltjie bring dit hier aan en steek hulle vas aan 'n doring. Ek het gedink hierdie een is al dood, maar voor ek die foto geneem het, druk ek met die kamera teen hom, toe ruk hy weg en span sy voorlyf styf, reg om toe te slaan. Net links van die slang is ook 'n stuk van 'n duisendpoot, dis alles kos vir die voëltjie en sy wyfie.

Na hierdie slang het hy nog twee hier aangebring. Watter soort slange dit is, weet ek nie, maar dit kan nie almal onskuldige soorte wees nie, hulle lyk nie almal eenders nie.

Ek het nou maar die doringboompie laat uithaal, want ek sien nie kans vir die gevaar dat 'n lewendige slang kan loskom en een van ons of ons hond byt nie. Die boompie het bowendien baie lang, lelike dorings en party mense was bang om daar te kom, want stukke tak met dorings breek soms af in die wind en lê daar rond, 'n gevaar vir ieder en elk.

Hoewel ek ten gunste is van die plant van inheemse bome voel ek hierdie een is ongewens en sal ek so gou moontlik 'n ander boompie kry om daar in te sit.

Miskien kan iemand my raad gee watter soort boom om te plant, wat redelik vinnig groei, sodat hy oor drie jaar darem al begin lyk na iets.

Groete,

Tiens