Litnet

Dagsê

Ons het gisteraand arriveer vanaf 'n heerlike vakansie uit die Nasionale Kruger Wildtuin. Dié tyd van die jaar moet jy natuurlik bereid wees om die hitte as salig te beskou, want die kwik kant tot 41grade braai. Dit beteken ook dat as jy kamp hou jy selfs gedurende die nag alles oop om asem te skep of onder die welkome aandwindjie af te koel.

Vanaf die eerste nag het ons gehoor van die 2 ratels wat snags daar rondsnuffel opsoek na kos. Soms het ek gehoor kinders gil en gesien as ligte op die ratels flits. Alles deel van opwinding en die bosveld!

Ek weet nie hoe skadeloos 'n ratel is, maar het geensins bedreigd gevoel op daardie stadium. Dis 'n pragdier wat soos 'n stinkmuishond lyk, tog sonder die strepe met 'n silwergrys "saal" wat oor die hele rug van die bokant van die kop tot by die begin van die stert strek. Later hoor ons dat hierdie dier 'n wrede vegter is met ongeoorloofde taktieke. Spiere van 'n prysvegter, mesagtige kloue en skerp tande. Blykbaar is daar gevalle waar ratels selfs 'n buffel of wildebees in konfrontasie se testikels afgeskeur het.

Nietemin - my aangenome dogter Blommie het vir ons vir die kampery 'n "kortdrop" (dis wat ons dit noem) aangeskaf. Omdat ons weet dat die hiënas en katte snags om die braaivure rondsnuffel, is dit veiliger om in die beskerming van die tente te bly en so die stap na ablusieblokke in te kort. Die kortdrop was dus heel gerieflik snags in die hoek van die kombuistent geplaas vir nood.

Of die nood te hoog was of afstand te ver tussen die twee tente, weet ek nie, maar Blommie het vergeet om die tent mooi toe te zip agter haar. Net toe sy haar sit kry ontmoet die blink van rateloë en mensoë mekaar in die dowwe skynsel van die buite kamplig. Omrede Blommie te besig was op daardie stadium om net op te spring, het sy haar postuur behou en hard aan die kant van die tentseil begin klap en skree.

Wie die grootste geskrik het van die twee, weet ek nie. Die reuke in die tentruimte ook vreemd. Aangesien die ratel se anale kliere 'n skerp, onaangename afskeiding vrystel tydens 'n geveg. Nodeloos om te noem dat alle tente van toe af tot op die uiterste toegezip was. Want snags kon jy die krapgeluid van die ratel se naels teen jou tentopening hoor soos hy oop plekkie soek.

Ek sluit af met 'n interessante feit omtrent die ratel. Die het blykbaar 'n legendariese verhouding met 'n klein voëltjie, die heuningwyser, wat die ratel na heuning lei met 'n opgewonde, kwetterende vertoning. Die voëltjie kry blykbaar sý deel wanneer die ratel die korf oopgebreek het en sal agterna dan heerlik aan die heuning en larwes smul.

Die Skepper het ongelooflike diere geskape. Die Kruger bestaan uit die mooiste bosveld asook Groot Vyf. Wat 'n genieting! Ek loof Hom vir Sy skeppingswerk. Mag Sy Woord vir ons altyd so soet soos heuning bly en die Heilige Gees ons Heuningwyser daartoe word.

Geniet julle dag

Trienie Mahne