Litnet

Ons het 'n geweldige inval van miere gehad. Dis die piepklein donkerbruin miertjies, en hulle was hier in hulle hordes. Jy kry hulle oral, in al die vertrekke van die huis: sitkamer, kombuis, slaapkamers en badkamer. Die hond se waterbak in die huis is elke dag vol miere soos hulle daarin versuip. As jy 'n leeggeskepte pot op die stoof los, is daar gou duisende miere in.

Tot my vriend se bed het deurgeloop, hy kon een nag amper nie slaap nie soos hulle hom lastig val. My ook, op my stoel in die sitkamer. Die enkelbed in my slaapkamer was vol miere, ook die klere wat ek daar neergooi. Gelukkig kon hulle nie op my dubbelbed klim nie, die pote is mos effens onder die bed in geplaas, sodat, as hulle teen die pote opklim, moet hulle 'n entjie onderstebo loop as hulle dan teen die kant van die bed wil opkom. En blykbaar kan hulle nie onderstebo loop nie. 'n Mier kan teen die poot van 'n bed oploop, maar nie onderstebo loop nie, lyk dit my.

Dis natuurlik oor die droogte. Die wêreld hier by ons was dor en uitgedroog, die gras geel. En dit nogal in die somer. Die afgelope twee, drie maande het ons by twee geleenthede elke keer omtrent net 'n teelepel reën gekry. Hier was talle veldbrande, gister nog het die enorme stuk veld langs ons gebrand, tot omtrent dertig meter van die eiendom se grensmuur af. Die brandweer lorries moes rondjaag om by al die vure te probeer uitkom, dan sien jy in die nag hul rooi ligte flits en die pompe maak 'n "tirrr"-dreuning soos hulle die water op die brande pomp.

Eers het ons die winkels se blikke spuitkannetjies met gif probeer, toe kry ek van die aanmaakgif met die woord "Ant" prominent op die boksie. Ek spuit waar ons hulle sien loop en twee dae na mekaar spuit ek twee keer reg rondom die huis. Die verwagting is dat hulle nie meer die huis sal binnekom nie. Maar dit help nie, hulle is sommer gou weer terug. As jy een paadjie vir hulle toegemaak het, kry hulle gou 'n ander. Dit lyk my die gif werk nie goed nie, want die volgende dag baljaar hulle alweer rond op die plekke waar ek gespuit het.

Nou ja, ek kry toe maar 'n ander soort gif. Hierdie een moet jy sterk aanmaak vir miere, 40ml gif op een liter water. Dit beteken die gif sal nie ver kom nie, jy sal nog moet koop.

Ek spuit eers my vriend se kamer, want hy sê hy kan dit nie meer uithou nie. Dis harde werk, want julle moet verstaan, die huis is oorvol meesal waardelose goed. Dit sluit in hope tydskrifte wat opgestapel lê. Net enkele sentimeters van die vloerlyste in sy kamer is sigbaar, dus moet jy goed skuif. Ek spuit, en gou lê die dooie miere op strepe. Oor drie dae, twee tot drie uur per keer, spuit ek al die vertrekke in die huis. Ek raak later bang dat ek sal siek word van vergiftiging, want ek het nie beskermende klere nie. En oral lê dooie miere, dit lyk maar sleg, as alles droog is sal ek dit opsuig met die stofsuier.

Ek voel nogal jammer vir die miere. Hulle werk amper wanhopig om hulle neste te red, dat die nes en die koningin oorleef. Maar wat kan jy doen? Mens kan nie so leef nie.

Na ek klaar is, is ons voorlopig vry van miere, jy sien net hier en daar 'n verdwaalde siel rondloop, asof hy verward is en nie weet wat aangaan nie.

Later, skoon aangetrek, gaan sit ek op my stoel in die sitkamer. En ek bid vir genade en vergiffenis vir al die miere wat ek doodgemaak het. En ek bid dat die Here my moet help dat die miere en hul koninginne se siele my ook moet vergewe.

Varkspek