Litnet

My ouers het nie depressie geken nie. As jongeling hoor ek hierdie vreemde woord by my ma wat in ’n tydskrif daarvan lees. ’n Grieselrige onderwerp. Nooit sou ek kon raai nie dat dit dié siekte van ons tyd sou word of dat ek self ook die bitter emosie van depressie sou smaak.

Vandag debatteer Nederland oor genadedood vir depressie. Volgens Amerika ly10% Amerikaners aan depressie en kos dit werkgewers biljoene rande in produktiwiteit.

Depressie is soos ’n swart kombers wat jou gees en siel smoor. ’n Swaarmoedigheid wat die lyer in ’n donker gat dompel en die dag van more soos ’n nagmerrie laat uitrafel.

Na my pa se dood slaan depressie sy tentakels om my gemoed. My hart raak droefgeestig en suig al my energie op. Gelukkig weerhou vrees my van anti-depressante en slaappille. Want ek het my ma se magtelose stryd aanskou toe geweldige onttrekkingsimptome haar in hul kloue vasgeklem het. Sy het haarself ’n senulyer genoem. Daar het ek die belofte gemaak dat ek nooit ooit op dieselfde wrede manier sou sterf nie.

Depressie is nie ’n siekte van die fisiese nie, maar van die gees. Die gees van die mens word vasgevang in donker wroeging as gevolg van die negatiewe gedagtes wat deur die brein aangevuur word. Medikasie onderdruk net die simptome van hierdie griesel en dit word nooit emosioneel deurgewerk of gekonfronteer nie.

In my depressie-smart keer ek na God vir ’n oplossing. As pastorie-kind was dit al hoop. Vandag juig ek oor die kennis wat dit meegewerk het. My gees moes bevry word van die duisternis en die Woord het my siel se gedagtegange positief begin stimuleer tot lewe en lig. Ek het ’n punt daarvan gemaak om weekliks gedeeltes van die Bybel te bestudeer en te ontleed en ondervind hoe die Hemelse Vader stadig maar seker my karakter en menswees omskep tot die vorm van Sy seun, Jesus Christus. Ek het ook geleer dat my depressie net die vrug was wat groei vanuit die boom van verwerping. Genesing kon eers inskop na vergifnis. Dit was moeilik, want ’n swak persoon kan nie vergewe, slegs ’n sterke.

In Suid-Afrika word depressie nog nie as ’n epidemie verklaar nie (hopelik?). Daar is hulp. Gekwalifiseerde beraders, maatskaplike werkers asook Christenkampe spreek hierdie probleem aan. Negatiewe en vulgêre insette vanaf die media skiet egter na die gemoed van die mens wat hierdie kanker vererger.

In Nederland is die storie hartseer. Pasiënte wie se dokters genadedood weier, kan nou na ’n kliniek gaan wat help om kroniese depressielyers se lewens te beëindig. Vernaam die wat nie meer kans sien vir die stryd nie.

Watse stryd? Die stryd teen die oorheersende duisternis wat jou siel wil steel en jou gemoed wil peper met swartgallige en negatiewe gedagtes.

Moord is nie ’n oplossing. Daar is net een oplossing. Innerlike transformasie. Romeine 12 koester ’n oplossing: “... maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is.”

Geluk en vrede is ’n keuse. Wees goed vir jouself!