Litnet

Die mens wat gedurig op hierdie forum sulke blertsies soos muismis laat en wat homself CM heet is die sprekende voorbeeld van een...

Sy kommentare soos ‘Die stomme ongelowiges moet verdelg word omdat hulle onsigbare almagtige wesens bedreig’ en ‘Die handelaars wat bulderend ekstra lewe adverteer, verkoop net katte in sakke’ en ‘ ‘n Menigte gee voor dat hulle heel modern soos gode dink, soos omskryf deur primitiewe voorgangers’ en ‘Die werklikheid is oneindig groter as die ruimte begrens deur ‘n kopbeen,’ dui duidelik daarop dat hy ’n agnostikus, selfs ’n ateïs, is, wat op sigself aandui dat hy homself gedurig met sy muismis-blertsies uitlaat oor dinge waarvan hy kennelik niks weet nie.

As hy iets geweet het van dié dinge waaroor hy so blerts, sou hy besef dat die ongelowiges nie verdelging in die gesig staar omdat hulle die onsigbare Almagtige bedreig nie – hoe kan hulle dít immers regkry – maar juis hulself omdat dit juis dié onsigbare Almagtige is Wie die bron van die Lewe is, waarvan hulle hulself só graag wil distansieer en hul mettertyd hul sin sal kry ... met groteske nadelige gevolge vir hulself.

Hy beblerts die sogenaamde ‘handelaars’ wie ekstra lewe in die hiernamaals adverteer, maar as hy wis waaroor hulle praat, sou hy kon besef dat hulle niks verhandel nie, omdat dié Boodskap van ewige Lewe by God, wat hulle verkondig, nie vir húlle vergoeding inhou nie, maar juis vir die stommerik wat dit verwerp, as hy dit maar sou aanneem ... so asof die stommerik vir dié Lewegewende geskenke iets moet betaal ... en dan meen hy so ewe dat dit katte in sakke is, so asof hy iets daarvan weet ...

Hy meen ook dat die sogenaamde ‘moderne’ op sy eie bene staan en dat die antieke (hy noem dit primitiewe) sonder waarde is, maar as hy werklik iets daarvan verstaan het, sou hy besef dat daar haas níks in die ‘moderne’ is, wat nie sy fondament stewig gevestig het in dít wat antiek is nie, want daar bestaan niks nou, wat nie al in die antieke óók bestaan het nie ...

Ergste van alles is dat sy stommiteit só gevorderd is dat hy nie kan besef hoe hy homself met sy eie blerts afkraak nie – want hy erken en verkondig dat die werklikheid oneindig groter is as die ruimte begrens deur ‘n kopbeen, terwyl hy self en die ander soos hy, juis in hul lewensfilosofie dié waarheid vertrap, omdat húlle juis nét daarmee wat tussen hul úíters begrensde kopbene is, ’n ewe begrensde werklikheid probeer skep en dan sulke goed kwytraak soos wat ons hulle dit sien doen.

Dit is juis die gelowige wie die waarheid van die feit dat die werklikheid oneindig groter is as die ruimte begrens deur ‘n kopbeen, erken, herken en uitleef. God is die Werklikheid Wie glad nie deur die kopbeen begrens kán word nie.

Maar hoe sal die stommerik-kommentator dít nou kan weet, hy wat vir homself binne die uiters beperkte vier mure van sy eie kopbeen, wat hy sy 'rede' noem, ’n hele werklikheid probeer skik. Ons ander besef hoe ’n onbegonne taak dít is en ons besef maar net terdeë hoeveel van die werklikheid dié stommerik moet weglaat omdat die binne-die-kopbeen-spasie al te gou versadig raak ...

Kobus de Klerk